Dunya Uyghur qurultiyi: "Qirghizistanliq kishilik hoquq pa'aliyetchisi kamil ruziyéfning ehwalidin qattiq endishe qiliwatimiz"

Muxbirimiz erkin
2020-06-12
Élxet
Pikir
Share
Print

Dunya Uyghur qurultiyi 11-iyun küni bayanat élan qilip, qirghizistanliq Uyghur kishilik hoquq pa'aliyetchisi kamil ruziyéfning ehwalidin qattiq endishe qiliwatqanliqini bildürdi. Dunya Uyghur qurultiyi bayanatta, qirghizistan da'irilirini "Kamil ruziyéfning hoquqigha hörmet qilishqa, uninggha qaritilghan xata eyibleshni bikar qilishqa we uni derhal qoyup bérishke" chaqirghan. Kamil ruziyéf qirghizistanning issiqköl rayonluq dölet bixeterlik organliri teripidin 29-may küni qaraqol shehiride tutqun qilinip, 31-may küni uninggha a'ilide nezerbend qilish jazasi bérilgen.

Dunya Uyghur qurultiyining bildürüshiche, kamil ruziyéf Uyghur kishilik hoquq mesiliside aktip bolup, u "Wentus kishilik hoquq teshkilati" rehbiri bolush süpitide nuqtiliq qirghizistandiki kishilik hoquq depsendichilikige bolupmu, ten jazasigha qarshi turush, a'ile ichi zorawanliq weqelirige qanuni yardem bérish pa'aliyetliride bolup kelgen iken. U ilgiri özining pa'aliyiti seweblik qirghiz bixeterlik xadimining parakendichiliki we tehditige uchrighanliqini bildürgen.

Kamil ruziyéf yéqinda qirghiz bixeterlik xadimi, qirghizistan dölet bixeterlik idarisi we qirghizistan yerlik teptish mehkimisi üstidin sotqa erz sun'ghan. U qirghizistan yerlik teptish mehkimisini özining tehditke uchrighanliqigha da'ir erzini tekshürmeslik bilen eyibligen. Bayanatta dunya Uyghur qurultiyining re'isi dolqun eysa qirghizistan da'irilirini kishilik hoquq pa'aliyetchiliridin öch almasliqqa chaqirip, "Ruziyéfning xizmiti qirghiz xelqining turmushini yaxshilashqa muhim töhpe qoshmaqta. Qirghizistan hökümiti uning awazini anglishi, uni jimiqturushqa urunmasliqi kérek" dégen.

Toluq bet