Yawropa parlaménti: "Lagérlardiki tutqunlarni derhal we shertsiz qoyup bérishke chaqirimiz"

Muxbirimiz erkin
2019-04-19
Élxet
Pikir
Share
Print

Yawropa parlaménti 18‏-aprél küni mutleq köp awazning qoshulushi bilen qarar layihesi maqullap, xitay hökümitini Uyghur rayonidiki yighiwélish lagérlirini taqashqa, tutqunlarni qoyup bérishke shuningdek az sanliq milletlerning til, medeniyet, diniy étiqad, söz erkinliki we bashqa tüp kishilik heq-hoquqlirigha hörmet qilishqa chaqirghan.

Qarar layiheside Uyghur, qazaq, tibet, xristiyan we bashqa étnik hem diniy guruhlarning ehwalidin qattiq endishe qiliwatqanliqi eskertilip, "Xitay hökümitini Uyghur, qazaq we tibetlerni gunahsiz, sotsiz yaki héchqandaq jinayet artilmay xalighanche tutqun qilish qilmishlirigha xatime bérishke, barliq lagérlarni yaki tutup turush merkezlirini taqashqa, tutqunlarni derhal we shertsiz qoyup bérishke chaqirimiz" déyilgen.

Yawropa parlaméntining mezkur qarar layihesi 21‏-nöwetlik yawropa ittipaqi-xitay bashliqlar uchrishishi ötken hepte ötküzülüp arqidinla élan qilin'ghan. Ötken heptidiki bashliqlar yighinida yawropa ittipaqining prézidénti tusk yawropa ittipaqi üchün "Kishilik hoquqning iqtisadi menpe'ettin muhim" orunda turidighanliqini tekitligen. Shuningdek yighinda bezi indiwidu'al shexslerning mesilisini otturigha qoyghan bolsimu, lékin omumi jehettin kishilik hoquq bek tekitlenmigen idi.

Yawropa ittipaqining bu qétim maqullan'ghan qarar layiheside yene xitay hökümitining ilham toxti, tashpolat téyip, rahile dawut, éli mamut, gheyret niyaz, memetjan abdulla, abduxélil zunun qatarliq tutqundiki Uyghur serxillirini qoyup bérishini telep qilghan. Qarar layiheside yene xitay hökümitini xelq'ara tekshürgüchilerning tibet we Uyghur rayonlirida heqiqiy tekshürüsh élip bérishigha yol qoyushqa, yawropa ittipaqigha eza döletlerni kéler nöwetlik b d t kishilik hoquq kéngishining yighinida delil toplash guruppisi qurup, Uyghur rayonida tekshürüsh élip bérishigha yétekchilik qilishqa chaqirghan. Bu yawropa parlaméntining yéqinqi 6 ay ichide 2‏-qétim Uyghurlar heqqide qarar layihesi maqullishidur.

Toluq bet