Харвард университетиниң сабиқ оқуғучилири әкбәр әсәт һәққидә мураҗиәтнамә елан қилди

Мухбиримиз әзиз
2020-06-10
Елхәт
Пикир
Share
Принт

2016-Йили америка ташқи ишлар министирлиқиниң хәлқаралиқ рәһбәрлик программисиға қатнашқан «бағдаш» ториниң қурғучиси әкбәр әсәт үрүмчигә қайтқандин кейин из-дерәксиз ғайиб болған иди. Кейинчә униң тутқун қилинғанлиқи мәлум болди. 9-Июн күни харвард университетиниң сабиқ қанун пәнлири оқуғучилиридин 80 нәччә киши айрим-айрим һалда америка һөкүмити вә хитай һөкүмитигә әвәтилгән бирләшмә мәктупқа имза қоюп, әкбәр әсәдниң әркинликкә чиқишини тәләп қилди.

CNN Агентлиқиниң 9-июндики хәвиридә ейтилишичә, әкбәрниң һәдиси рәйһан әсәт әйни вақитта харвард университетида қанун пәнлиридин магистирлиқ унвани алған болуп, 2020-йилиниң бешида инисиниң қолға елинғанлиқи вә 15 йиллиқ қамаққа һөкүм қилинғанлиқини дәлиллигән иди.

Бу қетимқи бирләшмә мәктупниң хитай һөкүмитигә әвәтилгән нусхисида 50 нәччә дөләттин кәлгән бу сабиқ оқуғучилар «әкбәр әсәдниң қолға елинишидин бәкму ғәзәпләнмәктимиз» дегән. Шуниңдәк америка туприқида мәлум мәзгил оқуш вә зиярәт билән мәшғул болған кишиләрниң өз дөлитигә қайтқандин кейин һәрқачан иҗабий тәрәққиятларға түрткә болуп кәлгәнлики, әкбәрниң болса у яқтин қайтишиға буяқтин қолға елинип мәхпий сотта қамаққа һөкүм қилинишини һәргизму қобул қилишқа болмайдиғанлиқи алаһидә тәкитләнгән.

Бирләшмә мәктупниң америка һөкүмитигә йезилған қисмида адвокатлар әкбәр әсәдниң америка ташқи ишлар министирлиқи уюштурған паалийәткә қатнашқанлиқиниң униң қолға елинишидики муһим сәвәб болуши еһтималлиқини тәкитләп: «һазир рәйһан америка һөкүмитидин инисиниң һөрлүккә чиқишиға ярдәмлишишни сораватиду. Бизму униң билән бирликтә америка һөкүмити вә америка президентидин бу ишқа җиддий көңүл бөлүшни сораймиз,» дегән.

Америка президенти доналд трамп һазирчә бу һәқтә ашкара сөз қилмиған болуп, рәйһан әсәт өзиниң униңдин зор үмидләрни күтидиғанлиқини, шундақла йеқинда қанунға айлиниш алдида турған «уйғур кишилик һоқуқ сиясити қанун лайиһәси» ниң иниси әкбәрниң әркинликкә чиқишиға ярдәмдә болушини үмид қилмақта икән.

Пикирләр (0)
Share
Толуқ бәт