El söygen naxshichi, kompozitor mehmut sulayman wapat boldi

Muxbirimiz jewlan
2020-11-23
Share

Uyghurlarning ijtima'iy alaqe torlirida keng xewer qilinishiche, dangliq naxshichi we kompozitor mehmut sulayman bu yil 22-noyabir ürümchide 52 yéshida yürek késili bilen wapat bolghan. Bu xewer merhumning xatire süretliri we wapatigha a'it widyoliri bilen birlikte tarqalghandin kéyin weten ichi we sirtidiki Uyghurlarni qayghu-matemge chömdürgen bolup, torlarda her xil teziye tilekliri, eslime we mersiyeler élan qilinishqa bashlighan. Shuning bilen birlikte uning ölümige a'it her xil perezler otturigha chiqqan, beziler uning tuyuqsiz wapatini korona wirusigha munasiwetlik dep qarisimu, bu heqte hazirghiche éniq ispat yoq.

Merhum mehmut sulayman 1968-yil qeshqer shehiride tughulghan, 1981-yil diyarimizdiki sen'et institutining ussul kespide oqughan, 1985-yil oqush püttürüp qeshqer sen'et ömekte ussulchi bolup ishligech muzika ijadiyiti bilen shughullan'ghan. 1990-Yili "Riwayet" muzika etritini qurghan we "Riwayet", "Salam dostlar", "Yultuzum" qatarliq ün'alghu lintilirini chiqirip dang qazan'ghan. 1997-Yil aptonom rayonluq sen'et ömikige yötkilip kelgen. 2005-Yil shangxey muzika uniwérsitétigha imtihan bérip ötken. 2006-Yil "Séghinmidingmu" dégenMTV plastinkisini chiqarghan. U yene "Yipek yoli sadasi" we "Men naxshichi" programmilirida yétekchi ustaz bolghan. U Uyghur xelqi yaxshi köridighan köpligen naxshilarni ijad qilghan, orunlighan talantliq naxshichi bolupla qalmay, kesipte téximu örlesh üchün harmay-talmay ögen'gen we izden'gen sen'etkar bolup, köpligen yash naxshichi we muzikantlarni terbiyi'eligen hemde ulargha kesip we exlaq jehettin ülge bolghan.

Merhumning axiretlikini uzitishqa a'it süretlerdin ashkarilinishiche, merhumning jinaza namizigha qatnashqanlar tolimu az bolup, jinazigha dastixandek bir nerse yépip qoyulghan. Jama'etning méyitni öz qa'idisi boyiche uzitip, öz layiqida depne qilalmighanliqi körünüp turidu. Bu heqte torda pikir bayan qilghanlarning bildürüshiche, eng échinishliq yéri, xelq özi yaxshi körgen bu sen'etkarni daghdugha bilen uzitip qoyalmighanning üstige, uninggha ashkare du'a-tileklirinimu bildürelmigen. Bu xitayning Uyghur diyarida yürgüzüwatqan teqib we qorqunchluq siyasitining qaysi derijige barghanliqini eks ettürüp béridu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet