Уйғур аптоном районлуқ һөкүмәт системисидики әмәлдар тәңшәш диққәт қозғимақта

Мухбиримиз әзиз
2021-12-01
Share

Хитай һөкүмити башқуришидики “тәңритағ” ториниң 28-ноябирдики хәвиридә ейтилишичә, уйғур аптоном районлуқ һөкүмәт йеқинда бир қатар кишиләрни йеңидин вәзипигә тәйинлигән.

Хәвәрдә ейтилишичә, бу қетим йеңидин вәзипигә тәйинләнгәнләр ичидә уйғур аптоном районлуқ һөкүмәтниң муавин рәисликигә өстүрүлгән йүсүпҗан мәмәт алаһидә диққәт қозғиған. 1968-Йили туғулған йүсүпҗан илгири уйғур аптоном районлуқ мәдәнийәт вә саяһәт назаритиниң назири, шиән шәһириниң муавин башлиқи қатарлиқ вәзипиләрни өтигән болуп, 2021-йили өктәбирдә уйғур аптоном районлуқ партком даимий комитетиниң әзаси болған икән. Униң әркин тунияз техичә уйғур аптоном райониниң мувәққәт рәис болуп туруватқан бир мәзгилдә шиән шәһиридин йөткәп келиниши, бу һәқтики охшимиған тәхминләрни пәйда қилмақта икән.

Хәвәрдә ейтилишичә, йеқинда “тәкшүрүш” кә елип кетилгән уйғур аптоном районлуқ йеза-игилики-йеза назаритиниң назири турсунҗан елиниң орниға қурбанҗан қутлуқ йеңидин назирлиққа тәйинләнгән. Униңдин башқа әнвәр ибраһим вә абликим әзиз айрйм-айрйм һалда маарип назарити вә мәдәнийәт назаритиниң назирлиқиға тәйинләнгән.

Һәрқайси учурлардин мәлум болушичә, уйғур дияридики көплигән юқури дәриҗилик уйғур рәһбирий кадирлар өткән бирнәччә йиллиқ сиясий бастуруш җәрянида “икки йүзлимичилик” яки “партийә интизамиға хилаплиқ қилиш” дегәндәк әйибләшләр билән қолға елинған һәмдә охшаш болмиған қамақ җазалириға һөкүм қилинған иди. Америкадики сиясий анализчи чен покоң буниңдин илгири сабиқ рәис нур бәкриниң қолға елиниш һәмдә муддәтсиз қамаққа һөкүм қилиниш мунасивити билән радийомиз зияритини қобул қилғанда: “хитай һөкүмити һечқачан һечқандақ уйғур рәһбирий кадирға ишинип баққан әмәс. Уларниң роли түгигәндә хитай мәркизий һөкүмити охшимиған усуллар арқилиқ уларни көздин йоқитип кәлмәктә,” дегән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт