Уйғурлар дияридики әмгәк күчлириниң йөткилишидә көрүлүватқан ғәйрийликләр диққәт қозғиди

Мухбиримиз әзиз
2017.08.22

Хитай һөкүмити йиллардин буян уйғурлар диярида зор миқдарда “ешинча әмгәк күчи” барлиқини давраң қилип келиватқан болуп, “уйғурларни ишқа орунлаштуруп бай қилиш” намида тарим вадисидики уйғур деһқанлирини хитайлар башқурушидики завутларға әрзан әмгәк күчи сүпитидә йөткәшни давам қилмақта.

“тәңритағ” ториниң бүгүнки хәвиридә ейтилишичә, хитай даирилири авғуст ейиниң бешида мәкит, пәйзиват қатарлиқ җайлардин йәттә йүзгә йеқин деһқан пәрзәнтлирини байинғолин областиға қарашлиқ башәгим шәһиридики “иқтисад санаәт райони” ға йөткигән. Һазир бу деһқан пәрзәнтлири мәзкур районға тәвә техникилиқ тәрбийәләш мәркизидә хитай тили, милләтләр иттипақлиқи қатарлиқ темилар бойичә тәрбийәләнмәктә икән.

Һалбуки, уйғурлар дияридики һәрқайси торлардин мәлум болушичә, бу йилниң өзидә хитай өлкилиридин 30 миңдин артуқ хизмәтчи қобул қилиш һәққидә елан берилгән. Булар асаслиқи һөкүмәт хизмәтчилири, сақчилар вә хитай тили оқутқучилири болуп, уларниң ичидики алаһидә дәриҗилик оқутқучиларға әң көп болғанда бир айда 20 миң сомғичә мааш берилидиғанлиқи вәдә қилинған. Буниң ичидә хотән тәвәсигә үч миңдин артуқ оқутқучи қобул қилинған. Улар адәттә имтиһансиз қобул қилинидиған болуп, он миң сомғичә айлиқ мааш, һәқсиз өй қатарлиқ тәминатлардин бәһримән болған.

Уйғурлар дияридики вәзийәтни көзитип келиватқан анализчилар, әмгәк күчлирини тәқсимләштики бу хил ғәйрийлик һәққидә тохтилип, буни хитай һөкүмитиниң “хитай көчмәнлирини мәзкур районға көчүп келишкә риғбәтләндүрүш һәмдә шу арқилиқ уйғурларни ассимилятсийә қилиш қәдимини тезлитиш тәдбирлириниң бир қисми” демәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.