Хитайниң әмгәк мупәттиши тәшкилатлириға тәһдит селиши американи әндишигә салған

Мухбиримиз әркин
2021.06.28

Хитай даирилириниң хитайдики мал тәминат зәнҗирини назарәт қилидиған мупәттиш тәшкилатлириға тәһдит селиши америка ташқи ишлар министирлиқини әндишигә салған. Америкадики “оксиос” ториниң хәвәр қилишичә, америка ташқи ишлар министирлиқи баянатчиси “‍оксиос” ториға баянат берип: “биз тәминат зәнҗири мупәттишлириниң хитайдики һалқилиқ хизмити җәрянида тутқун қилиниши, тәһдиткә учруши, паракәндичилик вә давамлиқ назарәт қилинғанлиқиға даир хәвәрләрдин чуңқур әндишә қиливатимиз” дегән.

“оксиос” ниң хәвири байден һөкүмити американиң иттипақдаш дөләтләр билән бирлишип, хитайниң уйғур мәҗбурий әмгәк мәһсулатлирини хәлқара мал тәминат зәнҗиридин тазилайдиғанлиқини елан қилған шундақла америка кеңәш палатасиниң ташқи ишлар комитети ‍өткән һәптә “уйғур мәҗбурий әмгикини чәкләш қанун лайиһәси” ни мақуллап, бу лайиһәниң қанунға айлиниши ‍үчүн муһим қәдәм басқан бир мәзгилдә елан қилинди.

Мәлум болушичә, хитай даирилири бу йил 4-айда америкадики “вәрити” намлиқ хәлқара иқтисади мупәттиш ширкитиниң хитайдики 7 нәпәр һәмкарлашқучисини бир қанчә күн сорақ қилған.

Хитай һөкүмити иқтисади мупәттиш ширкәтлириниң уйғур елидики мал тәминат зәнҗирлирини тәкшүрүшигә ‍изчил тосқунлуқ қилип кәлгәниди. Америка ташқи ишлар министирлиқи баянатида йәнә “карханиларни шинҗаңдики кишилик һоқуқ дәпсәндичиликигә четишлиқ орунлар билән сода қилишниң инавәт, иқтисади вә қануни хәвпи барлиқи” тоғрисида агаһландуруп: “биз хитай хәлқ җумһурийитиниң шинҗаңдики вәһшийликини җавабкарлиққа тартишта имкан болған барлиқ вастиларни давамлиқ ишлитимиз” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.