Алий мәктәпләрдики “әмгәк” тәшвиқати диққәт қозғимақта

Мухбиримиз әзиз
2021-12-22
Share

Хитай һөкүмити башқурушидики “хитай хәвәрлири” ториниң 22-декабирдики хәвиридә ейтилишичә, йеқиндин буян уйғур дияридики һәрқайси алий мәктәпләрдә “әмгәк арқилиқ гүзәл кәлгүси бәрпа қилиш” темисидики тәшвиқат башланған.

Хәвәрдә ейтилишичә, бу қетимлиқ йүрүшлүк лексийә сөзләш паалийитидә алий мәктәпни пүттүргән оқуғучилар вәкиллиридин әкбәр турсун өзиниң йеқинда шопурлуқни өгинип йүк машинисиға шопурлуқ қиливатқанлиқини, шундақла “кәспий тәрбийәләш” арқилиқ бағвәнчилик техникисини игиләп нәшпүтлүк бағ бәрпа қилип бай болғанлиқини сөзлигән. У сөзидә “шинҗаңда биз немә хизмәт қилишимиз яки қәйәрдә хизмәт қилишимиз пүтүнләй бизниң ихтияримизда. Америка җаһангирликиниң ‛шинҗаңда мәҗбурий әмгәк давам қиливатиду‚ дегини пүтүнләй ялған” дегән.

Бу қетимлиқ лексийә паалийитидә сөз қилған уйғур алий мәктәп оқуғучилири бирдәк өзлириниң “кәспий тәрбийәләш” арқилиқ түрлүк маһарәтләрни игиликәнлики, шу арқилиқ бақмичилик, бағвәнчилик яки деһқанчилиқ дегәндәк игилик билән шуғуллиниватқанлиқини тилға алған. Әмма өзлириниң алий мәктәптә өгәнгән кәсиплири бойичә хизмәт қилғанлиқи һәққидә бир еғизму сөз қилмиған.

Хитай һөкүмитиниң бу қетимлиқ тәшвиқатиниң “уйғур мәҗбурий әмгикини чәкләш қанун лайиһәси” ниң қанунға айлиниш һарписида тәшкиллиниши һәр саһәниң диққитини қозғиди. Болупму уйғур алий мәктәп оқуғучилириниң йиллардин буян ишсиз йүрүватқанлиқи, ишханиларда иш беҗиридиған кәспий хизмәтләрниң хитай аққунлиридин ашмайдиғанлиқи, уйғурларниң пахта териштәк еғир җисманий әмгәккә мәҗбур болуватқанлиқи уйғур дияриға барған көплигән саяһәтчиләрниң баянлирида көп қетимлап тилға елинғаниди. Әмдиликтә хитай һөкүмитиниң давамлиқ һалда мәҗбурий әмгәк мәсилисини инкар қилиши уларниң әйни вақитта лагерларниң мәвҗутлуқини инкар қилғинини әсләтмәктикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт