Хитай һөкүмити «әмин өй қурулуши» арқилиқ уйғурларни земинидин айришни давам қилмақта

Мухбиримиз ирадә
2020-10-01
Елхәт
Пикир
Share
Принт

Хитай һөкүмитиниң «әмин өй қурулуши» намида уйғурларни өй-маканлиридин айрип, башқа җайларға йөткәватқанлиқи мәлум болмақта.

Йеқинда хитайниң «шинҗаң гезити» елан қилған бир хәвәрдә ейтилишичә, уйғур елидә «төвән киримлик ​​аилиләрниң туралғу қийинчилиқини яхшилаш» дегән баһанә билән «13-бәш йиллиқ пилан» ичидә пүтүн райондики шәһәр-базарларда 1 милйон 281 миң йүрүш әрзан баһалиқ иҗарә өй қурулуши тамамланған болуп, «әрзан баһалиқ иҗарә өйләр техиму көп аилиләрниң тинч яшаш арзусини әмәлгә ашурди,» дәп мәдһийиләнгән.

Һалбуки, әмин өй қурулуши чәтәлләрдики көзәткүчиләрниң қаришичә, уйғурларни өй-земинлиридин айрип, уларни мәлум бир районға топлаш, уларни иқтисадий кирим мәнбәсидин айришни мәқсәт қилған икән. Илгири бу һәқтә қумулдики тағлиқ районларда әвладму-әвлад яшап кәлгән земинлиридин мәҗбурий қоғланған уйғурларниң дәл мушундақ әрзан баһалиқ иҗарә өйләрдә олтурушқа мәҗбур болғанлиқи радийомизда хәвәр қилинған иди.

Юқириқи хәвәрдин қариғанда, бундақ әрзан иҗарә өй қурулушлири җәнубтики төт вилайәт вә областта муһим қурулуш сүпитидә йолға қоюлған болуп, һазирғичә аммиви туралғу райониниң 60 пирсәнти игиләп болған икән.

Һалбуки, бүгүн йәнә хитайниң «шинҗаң гезити» дә тарқитилған йәнә бир хәвәрдә уйғур елидә йеза туралғу қурулуш түрлириниң тамамлиниш нисбити 94. 54 Пирсәнткә йетип, 2020-йилида 70 миң 903 йүрүш өй пүткәнлики хәвәр қилинған. Көзәткүчиләрниң қаришичә, бу өйләр дәл хитайниң ичкири өлкилиридин кәлгәнләргә һәқсиз бериливатқан өйләр болуп, уйғур аптоном районлуқ даириләрниң бу өйләрниң сүпити вә бихәтәрликигә бериватқан йүксәк әһмийитиму буни испатлап турмақта.

Бу һәқтики хәвәрдә даириләрниң бу өйләрниң сүпитини назарәт қилиш үчүн җәмий 47 наһийәдә 3249 йеза өйлирини зиярәт қилғанлиқи, йеза туралғу өйлирини башқуруш вә қоғдаш механизми орнитиш үстидә актип издинип, туралғу бихәтәрликини назарәт қилиш, балдур агаһландуридиған вә ярдәм беридиған системини мукәммәлләштүрүп, туралғу бихәтәрликигә капаләтлик қилинидиғанлиқи алаһидә әскәртилгән.

Хитай һөкүмити 2017-йили уйғурларға кәң көләмлик тутқунни башлиғандин кейин һәдәп ичкири өлкиләрдин хитайларни уйғур райониға көчүп келишкә чақирмақта. Һазир көчүп кәлгәнләргә бикарлиқ өй, бикарлиқ йәр берилидиғанлиқи һәққидики еланлар очуқ-ашкара хитай тор бәтлиридә тарқалмақта.

Пикирләр (0)
Share
Толуқ бәт