Uyghur diyaridiki énérgiye sahesige sélinidighan meblegh ashurulidu

Muxbirimiz ümidwar
2017-04-02
Share

Uyghur aptonom rayoni da'iriliri bu yil Uyghur diyarining énérgiye sahesige salidighan mebleghning nisbitini ötken yildikige qarighanda zor derijide ashurghan.

Melum bolushiche, yéqinda Uyghur aptonom rayonluq hökümet 2017-yilliq bir meblegh sélish xizmet layihesini élan qilip, bu yil ichide Uyghur rayonining asasliqi kömürchilik, ot éléktir énérgiyesi, yéngi tiptiki énérgiye, kömür ximiye sana'iti, néfit we tebi'iy gaz sahesi hem bashqa türlerge 181 milyard som meblegh salidighanliqini élan qilghan.

"Shinjang énérgiye tori"diki bu heqtiki xewerdin ashkarilinishiche, bu yilqi mezkur köp türlük énérgiye sahesige sélinidighan meblegh ötken yildikidin 20 milyard 300 milyon yüen ashurulghan iken.

Uyghur rayon da'iriliri Uyghur diyarining xitayning zor énérgiye bazisi, bolupmu kömür, néfit we tebi'iy gaz jehette aldinqi qatardiki bazisi ikenlikini körsitip, buningdin kéyin yene ot éléktir, su éléktir we shamal küchi éléktir istansiliri qurulushliri hem kömür ximiye sana'iti qatarliqlarnimu kücheytidighanliqini bildürgen.

Melum bolushiche, xitay yene Uyghur diyaridiki tebi'iy gaz, néfit hem kömür ishlepchiqirish sahesige sélinidighan mebleghni ashurghan bolup, "Gherbning gazini sherqqe yötkesh", "Gherbning néfitini sherqqe yötkesh"pilani boyiche Uyghur diyaridin élinidighan teb'iy gaz, néfit we kömür qatarliqlarning ichkiri xitaygha yötkesh miqdarini dawamliq ashurmaqta iken. Emma, Uyghur közetküchilerning éytishiche, Uyghur rayonining jenubidiki tarim wadisi xitayning eng muhim tebi'iy gaz we néfit bazisi bolsimu, biraq bu yerlerdiki Uyghurlar eng kembeghel ahalilar qatarida sanalmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet