Enes kanterning toxtamsiz qélishi zor diqqet qozghidi

Xitay hökümitining zalimliqini, shuningdek Uyghur diyaridiki qirghinchiliqini ashkara tenqidlesh bilen tonulghan amérikadiki waskétbol mahiri enes kanter yéqinda “Boston klétliqlar” komandisidin “Xyuston rakétasi” komandisigha almashturulghan idi. Emma kütülmigende “Xyuston rakétasi” komandisi enes kanter bilen bolghan toxtamni bikar qilghanliqini élan qilghan.

“Döletlik teqriz” gézitining 15-féwraldiki xewiride éytilishiche, enes kanter bilen birlikte almashqan bashqa mahirlar “Xyuston rakétasi” komandisida qélip qalghan bolup, enes kanterla bu komandidin chiqiriwétilgen. Melum bolushiche, enes kanter béyjing qishliq olimpik musabiqisini toluq bayqut qilish chaqiriqini otturigha qoyghan, shuningdek xitay waskétbol cholpini yaw mingni “Xitay hökümitining qorchaq topchisi” dep atighan iken. Amérika waskétbol birleshmisi (NBA) diki bu ikki dangliq komandining enes kanterge tutqan mu'amilisi nöwette tashqiy dunyaning xitay hökümitige bolghan zor gumanini qozghimaqta iken. Beziler bolsa buning tesadipiyliq emeslikini alahide tekitlimekte iken. Bolupmu “Xyuston rakéta'isi” ning sabiq idare hey'etliridin daryl moréy 2019-yili xongkongdiki démokratiye herkitini hémaye qilip tiwéttérda uchur yollighanda, mezkur komanda xitay miqyasidiki “Xelq hujumi” gha duch kelgen idi.

Xewerde éytilishiche, enes kanter ilgiriki radiyo-téléwiziye söhbetliride özining NBA din siqip chiqirilish éhtimali barliqini tilgha alghan iken. Emma bu ehwal xitay hökümitini bekla xoshal qiliwetken bolup, xitay hökümitining karniyi bolghan “Yer shari waqti géziti” bu heqtiki obzor maqalisida “Enesning ‛xyuston rakitasi‚ komandisidin chiqiriwétilishi, ular üchün bir wirusni tazilighanliqqa barawer. Xelqimiz emdi boston komandisining top musabiqisini köridu” dégen. Ular buningdin ilgiri enes kanterni “Amérika merkiziy axbarat idarisi (CIA) ning jasusi” dep élan qilghan idi.