En'gliye parlaménti xitaydiki ichki ezalar oghriliqida Uyghurlarning nishan bolushini eyiblidi

Muxbirimiz eziz
2020.06.30

Xitay hökümitining Uyghurlargha qarita yolgha qoyuwatqan türlük tedbirliri en'gliye hökümitining zor naraziliqini qozghidi. Bolupmu xitaydiki adem ichki ezalirining shu kishining raziliqi bolmighan ehwalda mejburiy sughuruwélinishi heqqidiki uchurlar köplep melum bolghandin kéyin en'gliye parlaméntlirining ezaliri özlirining bu mesilige bolghan qattiq naraziliqini tekitlep “Hökümitimiz xitaygha qarshi keskin bir heriketke ötüshi lazim” dédi.

“Yaxu xewerliri” ning 30-iyundiki xewiride éytilishiche, erkin démokratlar partiyesidin bolghan parlamént ezasi alista'ir karmaykil we konsérwatiplar partiyesidin bolghan parlamént ezasi dunkan simit “En'gliye hökümiti mushundaq qebih tedbirlerni qolliniwatqan xitay hökümiti bilen yene qandaqlarche soda pa'aliyitini dawam qilidu?” dep so'al qoydi.

Bolupmu parlamént ezasi alista'irning “Ichki ezalar oghriliqi yillardin buyan dawam qiliwatqan milyonlighan Uyghurning lagérlargha qamilishi bilen zich baghlinishliq bolup kelmekte” dégen sözidin kéyin bu hadisining mahiyiti téximu köp kishilerge melum bolghan. En'gliye tashqi ishlar ishxanisining asiya ishlirigha mes'ul ministiri nayjil adams bu heqte öziningmu ashu xil qarashta ikenlikini bildürüp “Ichki ezalar oghriliqini tekitlesh bekmu jayida boldi. Bu ishlardin hazir nurghun kishiler xewerdar boldi. Emdi buninggha estayidil mu'amile qilmisaq bolmaydu” dégen.

Melum bolushiche, ichki ezalarni shu kishining i'ane qilish ruxsitini alghandin kéyin bashqa kishining bedinige köchürüsh dunya boyiche omumlashqan tébbiy qa'ide iken. Emma xitay hökümitining milyonlighan Uyghur qamalghan lagérlarni “Teyyar ichki ezalar ambiri” qiliwélishi nöwette xitay hakimiyitining Uyghurlargha qandaq mu'amile qiliwatqanliqini eng roshen körsitip bériwatqan amillardin biri bolup qalmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.