Әнглийә йеңи һөкүмити дөләт мудапиә баһалаш гурупписи хитайни “әҗәллик тәһдит” дәп қариған
2024.07.16
Әнглийә һөкүмитиниң истратегийәлик мудапиә ишлириға мәсул әмәлдари хитайниң “әҗәллик тәһдит” елип келидиған дөләтләр қатарида икәнликини билдүргән.
Әнглийә “пул-муамилә гезити” ториниң 15-июл бәргән хәвиридә ейтилишичә, әнглийә дөләт мудапиә министирлиқи йеқинда әнглийә дуч келиватқан хәвп-хәтәрни баһалаш гурупписи қурған болуп, буниңға натониң сабиқ баш катипи, әнглийә ишчилар партийәсидин болған сабиқ дөләт мудапиә вәзири җорҗ робертсон (George Robertson) қатарлиқ һәрбий әмәлдарлар вә мутәхәссисләр башчилиқ қилидикән. Җорҗ робертсон хәвп-хәтәрни йеңидин баһалашниң кәлгүси бир нәччә йилда әнглийә дуч келидиған тәһдит вә хирисларни ениқ көрситип беридиғанлиқини билдүргән. У хитай, русийә, иран вә чавшйәнни тилға елип: “биз барғансери һәмкарлишиватқан бу әҗәллик төт дөләткә дуч кәлдуқ” дегән.
Әнглийәниң алдинқи нөвәтлик консерватиплар партийәси һөкүмити хитайни “дәвр бөлгүч хирис, иқтисадий тәһдит” дегән болса, робертсон хитайни “әҗәллик тәһдит” дегән. У бу һәқтә чүшәнчә берип: “алдинқи һәптә вашингтонда өткүзүлгән нато башлиқлар йиғини хитайниң хирисиға һәқиқәтән әстайидил муамилә қилишқа тегишлик мәсилә икәнликини ениқ оттуриға қойди” дегән.
Бу қетим әнглийә ишчилар партийәси һөкүмәт бешиға кәлгәндин кейин, әнглийәниң һазирқи дөләт мудапиә вәзири җон һалей (John Healey) әнглийә билән хитайниң мунасивитигә йеңидин баһа берип, “хитай хирисиға тақабил туруш һөкүмәт һалқиған бир иштур, у һәтта дөләт мудапиәси биләнла чәкләнмәйду” дегән һәмдә йеңидин қурулған әнглийә һөкүмитиниң дөләт мудапиәси санаити билән әнглийә иқтисадини тәң гүлләндүрүш пиланини музакирә қилидиғанлиқини билдүргән.