Әнглийә баш министири хитайниң уйғурларни қоллиған парламент әзалириға ембарго йүргүзүшини “қобул қилғили болмайду” дегән

Вашингтондин мухбиримиз әркин тәйярлиди
2024.05.10

Әнглийә баш министири риши сунак билән ташқи ишлар министири дәйвид камирон, уйғурларни қоллиши сәвәбидин хитайниң җазалишиға учриған бәш нәпәр әнглийә парламент әзаси билән көрүшкән. Риши сунак бейҗиңниң бу кишиләргә җаза қоюшини “қобул қилғили болмайдиғанлиқи” ни билдүргән.

Мәлум болушичә, көрүшүштә хоңкоң түрмисидики өктичи җимий ләй, хитайниң әнглийәдики куңзи институтлири, университетларниң хитайға тайинип қелиши, тәминләш зәнҗири вә мәҗбурий әмгәк қатарлиқ темилар музакирә қилинған. Хәвәрләрдә йәнә, парламент әзалириниң хитайни әнглийәниң “чәт әл тәсир күчини тизимлаш қаидиси” гә киргүзүп, униң әнглийәдики һәрикитигә болған назарәтни күчәйтишни тәләп қилғанлиқи қәйт қилинмақта.

Бу көрүшүш, бәзи әнглийә парламент әзалири әнглийәниңму америка вә явропа иттипақиға охшаш қанун чиқирип, уйғур мәҗбурий әмгәк мәһсулатлирини қаттиқ чәкләшни, болмиса әнглийә хитай мәҗбурий әмгәк мәһсулатлириниң төкмә қилип сетиш базириға айлинип қелиши мумкинликини агаһландурған бир вақитта елип берилған. “хәлқара парламентлар ара хитай бирләшмиси” ниң X та елан қилған учуридин мәлум болушичә, баш министир риши сунак билән ташқи ишлар министири дәйвид камирон 8-апрел әнглийә юқири палата әзаси дәйвид алтон, баронә һелена киниди, авам палата әзаси сир иаян данкун симит, нусрәт ғәни вә неил оберайин қатарлиқлар билән көрүшкән.

Бу сиясеонлар әнглийә парламентиниң хитайниң уйғурларға ирқий қирғинчилиқ қилғанлиқини етирап қилишида һалқилиқ рол ойған. Хитай даирилири, әнглийәниң 2021-йили 3-айда америка, явропа иттипақи вә канада билән бирлишип, уйғур дияридики төт нәпәр хитай әмәлдари билән “шинҗаң ишләпчиқириш қурулуш биңтүәни” гә ембарго йүргүзүшигә қарши, бу бәш нәпәр парламент әзасини җазалиған иди. Әнглийә ташқи ишлар министири камирон X тики һесабида, “биз хитайниң әнглийә парламент әзалирини җазалишидин давамлиқ чоңқур әндишә қилмақтамиз” дәп көрсәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.