Әнглийәниң уйғурларни бастурушқа четишлиқ хитай ширкитини көргәзмигә тәклип қилиши тәнқидкә учриди

Мухбиримиз әркин
2020-02-17
Share

Әнглийә һөкүмитиниң уйғурларни бастурушқа иштирак қилиш билән әйиблинип келиватқан хитай технологийә ширкити‏-хәйкаң гуруһини әнглийәдә өткүзүлидиған бир көргәзмигә тәклип қилиши тәнқидкә учриған.

"муһапизәтчи" гезитиниң 17‏-февралдики хәвиридә ашкарилишишичә, әнглийә парламенти авам палатасиниң әзаси баб селий әнглийә ички ишлар министирлиқиниң тәклипнамисини қайта ойлишип көрүшини тәләп қилған.

Хитайниң хәйкаң ширкити дунядики әң чоң көзитиш әсваблирини ишләпчиқириш карханиси болуп, у хитайниң уйғур аптоном районида дигитал назарәт системиси бәрпа қилип, уйғурларни омумйүзлүк тәқибкә елишида техника җәһәттин һалқилиқ рол ойниған. Шу мунасивәт билән америка һөкүмити өткән йили мәзкур ширкәтни "қара тизимлик" кә алған иди. Лекин "муһапизәтчи" гезитиниң хәвиридә ашкарилишичә, әнглийә ички ишлар министирлиқи йеқинда мәзкур ширкәтниң бу йил 3‏-айда әнглийәдики фаринборода ечилидиған "бихәтәрлик вә сақчи сода көргәзмиси" гә тәклип қилишни қарар қилған. Лекин авам палата әзаси баб селий ички ишлар министирлиқиниң қарариға наразилиқи билдүрүп: "биз хитай вә юқири техника мәсилисигә кәлгәндә әхлақи өлчәмни қайрип қоймаслиқимиз керәк. Әгәр биз әнглийә қиммәт қарши вә өлчимини қоғлашсақ, биз һеч болмиғанда изчил көрүнүшимиз керәк," дегән.

"муһапизәтчи гезити" ниң илгири сүрүшичә, әнглийәниң көргәзмигә хәйкаң ширкитини тәклип қилиши америка билән йәнә бир йеңи ихтилап пәйда қилиши мумкин икән. Әнглийәниң борис җонсон һөкүмити техи йеқиндила хуавей ширкитиниң әнглийәни 5G үскүнилири тәминлишигә йол қойидиғанлиқини елан қилип, америкиниң наразилиқини қозғиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт