En'gliye tashqi ishlar ministiri xitayni xelq'ara qa'idilerge uyghun heriket qilish heqqide agahlandurghan

Muxbirimiz irade
2022.04.28
Share on WhatsApp
Share on WhatsApp

En'gliye tashqi ishlar ministiri liz trus( Liz Truss ) 27-aprél küni londonda qilghan sözide xitayni xelq'ara qa'idilerge uyghun heriket qilish heqqide agahlandurghan. U xitayning eksiche herikitining uning derijidin tashqiri dölet bolushtek arzusini sugha chilashturidighanliqini bildürgen.

Trus mundaq dégen: “Döletler choqum qa'ide boyiche heriket qilishi kérek. Bu xitaynimu öz ichige alidu. Eger ular qa'idige emel qilmisa, ular dawamliq örliyelmeydu. Chünki xitay G-7 döletliri bilen soda qilishqa mohtaj. Bu yette dölet dunya iqtisadining yérimigha wekillik qilimiz. Shunga bizning tallash hoquqimiz bar”.

U buninggha rusiyening ukra'inagha tajawuzchiliqi tüpeylidin dunya iqtisadidin ayriwétilgenlikini misal qilip körsitip: “Biz rusiye misali arqiliq xelq'araliq qa'idige xilapliq qilin'ghanda qandaq heriket qilidighanliqimizni dunyagha körsettuq” dégen we emdi gherbning bazirining asanliqche ochuq bolmaydighanliqini tekitligen.

En'gliye tashqi ishlar ministiri trus sözide yene hindi-tinch okyanning bixeterliki mesilisinimu tilgha élip “Biz hindi-tinch okyandiki tehditlerni aldin oylishishimiz kérek, yaponiye we awstraliye qatarliq ittipaqdashlar bilen hemkarliship, tinch okyanning qoghdilishigha kapaletlik qilishimiz kérek” dégen.

U yene mundaq dégen: “Biz choqum teywen'ge oxshash démokratik tüzümlerning özini qoghdishigha kapaletlik qilishimiz kérek”.

Teywen tashqi ishlar ministirliqi bolsa 28-aprél küni trus xanimning bu sözlirini qarshi élip inkas qayturghan hemde en'gliye we bashqa oxshash pikirdiki shérikler bilen bolghan hemkarliqni dawamliq chongqurlashturup, teywen boghuzining tinchliqi we muqimliqigha kapaletlik qilidighanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.