En'gliye xanishi shi jinping bilen birge kelgen xitay emeldarlirini “Edepsizken” dégen

Muxbirimiz jüme
2016.05.11

Xitay re'isi shi jinpingning ötken yilqi ziyariti heqqide toxtalghan en'gliye xanishi élzabét II xitay emeldarlirini “Intayin edepsiz iken” dep süretligen.

Amérika CNN téléwiziyesining 11-may xewer qilishiche, uning bu “Semimiy sözliri” shi jinpingning en'gliye ziyariti jeryanida bixeterlik ishlirigha mes'ul bolghan saqchi emeldari lusy dorisi xanimni qobul qilghanda apparatqa élinip qalghan.

Söhbet heqqidiki qisqa filimige qarighanda, shi jinpingning en'gliye ziyaritining aldi-keynidiki ishlar heqqide toxtalghan saqchi komandiri lusy dorisi xanishqa: “Sizning xewiringiz barmu-yoq bilmidim, emma men u chaghda zor sinaqlargha duch keldim” deydu.

Bu ishning uning zimmisige yüklen'genlikini bir “Teleysizlik” dep atighan xanish, “Elwette xewirim bar”, “Ular bash elchimizgimu qopalliq qiptu” deydu.

Dorisi xanimning xanishqa éytishiche, en'gliyege shi jinping ziyaritige munasiwetlik ishlarni sözlishishke kelgen xitay diplomatliri en'gliyening xitayda turushluq bash elchisi barbara wudward we saqchi komandiri dorisi xanim bilen söhbet ötküzüwatqan sorundin péshini qéqip chiqip kétishken we “Ziyaretni emeldin qaldurimiz” dep mutehemlik qilghan.

Dorisi xanimmu bu xitay diplomatlirigha “Bek terbiyisiz we bek diplomatik yosuni yoq” dep baha bergen.

Bu xewer otturigha chiqqandin kéyin, en'gliye xan ordisi “Xanishning shexsiy söhbetlirige pikir bildürmeydighanliqi” ni éytqan.

Bu heqtiki so'allargha duch kelgen xitay tashqi ishlar bayanatchisi lu kang shi jinpingning en'gliye ziyaritini emeldin qaldurush heqqide gep bolun'ghanliqidin xewersizlikini bildürgen.

Shi jinping ötken yili öktebirde en'gliyede ziyarette bolghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.