Әнглийә хитайни русийәниң таҗавузчилиқ урушини һәрбий ярдәм арқилиқ қоллиған, дәп әйиблигән

Вашингтондин мухбиримиз ирадә тәйярлиди
2024.05.23

Әнглийә дөләт мудапиә министири грант шапс хитайни “русийәни украинаға қарши урушта ишлитидиған әҗәллик қорал ярдими билән тәминлигән яки тәминләш алдида турмақта” дәп әйиблигән.

Ройтерс агентлиқиниң дейишичә, шаппс 22-май күни лондонда өткүзүлгән бир йиғинда қилған сөзидә “америка вә әнглийә мудапиә истихбарати органлириниң ‛хитайниң русийәгә қиливатқан қораллиқ ярдәмлириниң һазир русийәгә вә бу арқилиқ украинаға кириватқанлиқи‚ һәққидә мәлумат бар” дегән. У сөзидә “өзини мөтидил көрситишкә тиришип кәлгән хитайниң бу һәрикитиниң “әндишә қиларлиқ бир тәрәққиятлиқи” ни ейтқан.

Муһапизәтчи гезитиниң хәвиригә қариғанда, грант шапс (Grant Shapps) 23-май пәйшәнбә күни техиму илгирилигән һалда “русийә билән хитайниң украинада ишлитилидиған уруш әслиһәлиридә һәмкарлишиватқанлиқиға аит пакитлири барлиқини, әмма уни ахбаратларға ашкарилимайдиғанлиқини” дегән. У сөзидә йәнә, шималий атлантик әһди тәшкилати (NATO) ни ойғинишқа вә мудапиә расхотини көпәйтишкә чақирған. У мундақ дегән:

 “дуняниң ойғинидиған вақти кәлди. Бу дегәнлик биз конкрет пилан түзүшимиз вә иқтидаримизни ашурушимиз дегәнлик. Бу бизниң шерик дөләтләр ара һәрбий расхотни ашуруп, тәһдиткә тақабил туруш иқтидаримизни ашуруш үчүн асас селиштин башлиниду” .

Хәвәрдә дейилишичә, хитайниң лондондики баш әлчиханиси грант шаппсниң сөзини “пүтүнләй асассиз” дәп рәт қилған һәмдә әнглийәни “хитайни асассиз әйиблиди” дегән.

Һалбуки, русийә украинаға таҗавуз қилғандин бери, хитай билән русийәниң истратегийәлик шериклик мунасивити барғанчә йеқинлишип маңған болуп, икки тәрәп оттурисидики сода һәҗимиму өскән. Хитайниң русийәдин нефит вә тәбиий газ сетивелиш вә урушқа керәклик түрлүк лазимәтликләрни тәминләш арқилиқ русийә иқтисадини қоллаватқанлиқи мәлум. Йеқинда русийә пирезиденти виладимиз путин хитайни биваситә зиярәт қилип, бундақ һәмкарлиқни йәниму күчәйтишни вәдә қилишқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.