En'gliye xitayni rusiyening tajawuzchiliq urushini herbiy yardem arqiliq qollighan, dep eyibligen

Washin'gtondin muxbirimiz irade teyyarlidi
2024.05.23

En'gliye dölet mudapi'e ministiri grant shaps xitayni “Rusiyeni ukra'inagha qarshi urushta ishlitidighan ejellik qoral yardimi bilen teminligen yaki teminlesh aldida turmaqta” dep eyibligen.

Roytérs agéntliqining déyishiche, shapps 22-may küni londonda ötküzülgen bir yighinda qilghan sözide “Amérika we en'gliye mudapi'e istixbarati organlirining ‛xitayning rusiyege qiliwatqan qoralliq yardemlirining hazir rusiyege we bu arqiliq ukra'inagha kiriwatqanliqi‚ heqqide melumat bar” dégen. U sözide “Özini mötidil körsitishke tiriship kelgen xitayning bu herikitining “Endishe qilarliq bir tereqqiyatliqi” ni éytqan.

Muhapizetchi gézitining xewirige qarighanda, grant shaps (Grant Shapps) 23-may peyshenbe küni téximu ilgiriligen halda “Rusiye bilen xitayning ukra'inada ishlitilidighan urush esliheliride hemkarlishiwatqanliqigha a'it pakitliri barliqini, emma uni axbaratlargha ashkarilimaydighanliqini” dégen. U sözide yene, shimaliy atlantik ehdi teshkilati (NATO) ni oyghinishqa we mudapi'e rasxotini köpeytishke chaqirghan. U mundaq dégen:

 “Dunyaning oyghinidighan waqti keldi. Bu dégenlik biz konkrét pilan tüzüshimiz we iqtidarimizni ashurushimiz dégenlik. Bu bizning shérik döletler ara herbiy rasxotni ashurup, tehditke taqabil turush iqtidarimizni ashurush üchün asas sélishtin bashlinidu” .

Xewerde déyilishiche, xitayning londondiki bash elchixanisi grant shappsning sözini “Pütünley asassiz” dep ret qilghan hemde en'gliyeni “Xitayni asassiz eyiblidi” dégen.

Halbuki, rusiye ukra'inagha tajawuz qilghandin béri, xitay bilen rusiyening istratégiyelik shériklik munasiwiti barghanche yéqinliship mangghan bolup, ikki terep otturisidiki soda hejimimu ösken. Xitayning rusiyedin néfit we tebi'iy gaz sétiwélish we urushqa kéreklik türlük lazimetliklerni teminlesh arqiliq rusiye iqtisadini qollawatqanliqi melum. Yéqinda rusiye pirézidénti wiladimiz putin xitayni biwasite ziyaret qilip, bundaq hemkarliqni yenimu kücheytishni wede qilishqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.