Әнглийә сәһийә министирлиқи уйғур районидин келидиған сәһийә-сағламлиқ мәһсулатлириға чәклимә қоймақчи болған

Мухбиримиз җәвлан
2022-04-22
Share

Әнглийәдә чиқидиған “сиясәтчи” журнилиниң 21-апрелдики хәвиригә қариғанда, әнглийә сәһийә министири саҗид җәвид (Sajid Javid) әнглийә асасий қануниниң заманиви қуллуққа мунасивәтлик түзитилгән лайиһәси мақуллиниш алдида һәрикәт қоллинип, сәһийә-сағламлиқ мәһсулатлирини тәминләш линийәсидики қул әмгики амиллирини чиқирип ташлимақчи, йәни уйғур районидин келидиған сәһийә-сағламлиқ мәһсулатлириға чәклимә қоймақчи болған.

Заманиви қуллуққа қарши турғучилар саҗид җәвидниң бу тәдбирини 2015-йил әнглийәдә заманиви қуллуққа қарши қанун чиққандин буянқи чоң илгириләш дәп махтиған. Консерватиплар партийәсиниң сабиқ лидери данкин симит (Duncan Smith) саҗид җәвидниң бу һәрикитини “муһим тәдбир” дәп махтиған вә мундақ дегән: “мән һөкүмәтниң башқа орунлириниму мушундақ тәдбир қоллинишқа чақиримән. Биз бу арқилиқ дуняниң һәр қайси җайлирида аҗизларни қорқутуп езиватқан зораванларға күчлүк сигнал беримиз, адаләт хәнҗиримиз уларни бош қоймайду”.

Заманиви қуллуққа мунасивәтлик йеңи қанун лайиһәсидә “әнглийә пуқралар сағламлиқиға капаләтлик қилиш хизмити” келишимигә имза қойған хусусий ширкәтләрниң заманиви қуллуққа четилип қалмаслиқи тәләп қилинған болуп, қайси ширкәт буниңға әмәл қилмиса қара тизимликкә киргүзүлидикән. Әнглийә консерватиплар партийәсидин болған парламент әзалири бу қанунниң мақуллинишиға зор күч чиқириватқан болуп, хитайниң уйғурларға селиватқан зулумға қарши бесимни күчәйтмәктикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт