Лондон шәһәрлик йәрлик комитетниң йерими дегүдәк хитайниң уйғурларға мунасивәтлик назарәт системисини орнатқан

Мухбиримиз җәвлан
2021-02-19
Share

Ройтерс агентлиқиниң 18-феврал хәвәр қилишичә, әнгилийәдики "учур әркинлики" оргини тәминлигән мәлуматқа асасланғанда, лондон шәһәрлик йәрлик комитетниң йерими дегүдәк өзлириниң хизмәт бинасиға хитайда ишләнгән назарәт системисини орнатқан болуп, лондондики 32 йәрлик комитет вә әнгилийәдики 20 чоң шәһәр ишләткән назарәт системисиниң үчтин икки қисми хитайниң уйғурларни бастурушқа ишләткән назарәт системиси билән охшаш чиққан. Бу әһвал хусусий мәхпийәтлик һоқуқини қоғдиғучилар вә парламент әзалириниң диққитини қозғиған.

Хәвәрдә билдүрүлүшичә, хитайниң хәйкаң ширкити дуня бойичә назарәт үскүнилири тәминләйдиған әң чоң ширкәт, шундақла уйғур районидики назарәт системиси қурулушиға үскүнә тәминләп бәргүчи орун болуп, әнгилийәдики аз дегәндә 28 йәрлик комитет бу ширкәтниң мәһсулатини ишләткән. Йәнә 7 йәрлик комитет хитайниң иккинчи чоң назарәт үскүнилири тәминлигүчи орун болған дахуа ширкитиниң мәһсулатини ишләткән. Лондон шәһириниң 16 йәрлик комитети хәйкаң вә дахуа ширкитиниң мәһсулатини ишләткән; бу икки ширкәтниң мәһсулати американиң чәклимә қоюшиға учриғаниди.

"учур әркинлики" оргини лондондики 6 мәмурий район вә 3 йәрлик комитеттин уларниң хитайдин назарәт системиси сетивелишни тәләп қилған-қилмиғанлиқи тоғрисида учур тәминләп беришни тәләп қилғанда, улар униңға җаваб қайтурмиған яки у ишни инкар қилған. Бу үскүниләрни ишләткән йәрлик комитетниң бәзилири бу үскүниләрни 3-тәрәп арқилиқ сетивалғанлиқини, уларниң хәйкаң ширкитигә қоюлған чәклимини билмәйдиғанлиқини ейтқан болса, бәзилири бу үскүниләрдики йүз тонуш техникисини ишләтмигәнликини ейтқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт