Әнглийә ташқи ишлар министири хитайға уйғурлар мәсилисидики әндишисини тәкитлигән

Мухбиримиз әркин
2021-05-28
Share

Әнглийә ташқи ишлар министири доминик раб 27-май хитай ташқи ишлар министири ваң йи билән көрүшкәндә әнглийәниң уйғур вә хоңкоң мәсилилиридики әндишисини қайта тәкитлигән.

Ройтерс агентлиқиниң хәвәр қилишичә, әнглийә ташқи ишлар министирлиқи бу һәқтики баянатида, "ташқи ишлар министири хоңкоң вәзийити вә шинҗаңдики мәвҗут кишилик һоқуқ дәпсәндичиликигә болған әндишилирини қайта тәкитлиди шундақла б д т мутәхәссислириниң шинҗаңда чәклимисиз тәкшүрүш елип беришиға йол қоюшниң муһимлиқини әскәртти" дегән.

Доминик раб изчил хитайни қаттиқ тәнқид қилип кәлгән. У илгири "шинҗаңдики уйғур мусулманлириниң азаб-оқубәтлиригә", "бу көләмдики кишилик һоқуқ дәпсәндичиликигә сәл қарашқа болмайдиғанлиқи" ни ейтқан шундақла бу йил 22-март күни хитайниң уйғур елидики 4 әмәлдари билән униң ‍икки аппаратини җазалиғаниди.

Бирақ ройтерс агентлиқиниң билдүрүшичә, әнглийә ташқи ишлар министирлиқиниң баянатида йәнә икки тәрәп министирлириниң ахирида "икки дөләтниң содидин тартип җанлиқлар түриниң көп хиллиқини қоғдашқичә болған саһәләрдә һәмкарлишиш пурсити барлиқиға қошулғанлиқи", шундақла йәнә икки тәрәпниң бу мәсилиләр тоғрисида йәниму илгирилигән һалда музакирә елип бериш үчүн издинидиғанлиқи" ни билдүргәнлики тәкитләнгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт