En'gliyediki xitay elchisi Uyghur balilirining ata-aniliridin mejburiy ayriwétilgenlikini inkar qildi

Muxbirimiz irade
2019.07.08

En'gliyening BBC téléwiziyesi yéqinda türkiyediki Uyghurlarni ziyaret qilish asasida ata-aniliridin mejburiy ayriwétilgen Uyghur perzentlirining iz-dériki heqqide bir widé'oluq xewer tarqitip zor inkas qozghighanidi.

Xitayning en'gliyede turushluq bash elchisi lyu shawming bolsa Uyghur balilirining ata-aniliridin mejburiy ayriwétilgenlikini inkar qilghan. U sözide: “Hökümet balilarning ehwalidin yaxshi xewer éliwatidu. Ata-anilar xalighan waqitta bérip balilirini köreleydu” dégen.

Buning bilen BBC programma riyasetchisi özlirining peqet bir qétimda 400 a'ilining balisidin ayrilip qalghanliqi heqqide uchurgha érishkenlikini éytidu. Xitay elchisi lyu shawming birdem turup qalghandin kéyin buninggha jawab qayturup: “Eger shundaq balilar bolsa siz manga ismini béring, men ularning iz-dérikini qilip sizge dep bérey” dep jawab qayturidu.

BBC De tarqitilghan “Xitay, méning balilirim qeyerde” mawzuluq programmini muxbir jon sadwors türkiyede yashawatqan 60 etrapida Uyghur bilen ularning Uyghur rayonida qalghan we yoqap ketken perzentliri heqqide bergen guwahliqliri asasida ishligen. U bu uchurlargha asasen rayon'gha bérip tekshürüsh élip barghan. Gerche u bu atalmish “Yeslilerge” kirelmigen bolsimu, emma buning hergizmu adettikidek “Yesli” emesliki, halbuki uning on minglighan Uyghur perzenti yépiq halette “Terbiyelinidighan” jaylar ikenlikini bayqighan.

Dunya Uyghur qurultiyi xitay elchisi lyu shawmingning yuqiridiki sözlirige inkas qayturup: “Xitay hökümiti polattek pakitlar aldidimu yalghanchiliq qilishni dawamlashturmaqta. Biraq heqiqetler toxtimay ashkariliniwatidu” dégen.

Yéqinda amérika “Ways xewerliri” ning muxbiri “Isabélla yongmu xotendiki ziyaritide yétim balilar yighiwélin'ghan we yesli dep atiliwatqan bu jaylarning derwazisidin héchkimning kirip-chiqmighanliqini bayqighan. U programmisida “Shinjangda xitay hökümitining lagérlar we mushundaq yétimxanilar arqiliq zor kölemlik bir özgertip yasash layihesini emelge ashuruwatqanliqida shek yoq. Xitay hökümitining meqsiti éniq, u bolsimu yéngi bir ewlad Uyghurlarning Uyghur bolup yétishmesliki, ularni taki birdin-bir kimliki xitay bolup chiqquche, öz yiltizidin, medeniyitidin we hetta a'ilisidin qomurup tashlashtin ibaret. . .” dégenlerni bayan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.