Әнглийә баш министир намзати риши сунак сайлинип қалса өзиниң хитайға қаттиқ қол болидиғанлиқини билдүргән

Мухбиримиз әркин
2022.07.25
Share on WhatsApp
Share on WhatsApp

Әнглийә консерватиплар партийәсиниң баш министир намзатлиридин риши сунак, әгәр баш министирлиққа сайлинип қалса, хитайға қаттиққол болидиғанлиқи, хитайниң әнглийәгә “узун муддәтлик әң чоң тәһдит” икәнликини ейтқан. Риши сунакниң қәйт қилишичә, әгәр у сайлинип қалса, хитайниң әнглийәдики куңзи институтлирини тақайдикән. Йеқинда әнглийә сабиқ баш министир борис җонсон истепа бәргәндин кейин, консерватиплар партийәсидин униң орниға баш министир сайлаш сайлими ахирқи басқучқа киргән. Мәлум болушичә, нөвәттә баш министирлиқни сабиқ җонсон һөкүмитиниң ташқи ишла министири лиз трус билән малийә министири риши сунак талашмақта.

Риши сунак бу сөзләрни униң асаслиқ риқабәтчиси болған лиз трус риши сунакни хитай билән русийәгә қарита аҗизлиқ қилиш билән әйиблигәндин кейин ейтқан. Риши сунак, хитайниң әнглийәдики 30 куңзи институтиниң һәммисини тақайдиғанлиқи, хитайниң тил вә мәдәнийәт программиси арқилиқ юмшақ күчини тарқитишиниң алдини алидиғанлиқи, әнглийә университетлиридики хитай компартийәсини қоғлап чиқиридиғанлиқини билдүргән. Униң ейтишичә, у йәнә әнглийә ички җасуслуққа қарши туруш идариси MI5 ни ишқа селип, хитайниң җасуслуқ һәрикәтлиригә қарши туридикән, шундақла шималий атлантик окян әһди тәшкилати NATO ға охшаш хәлқара һәмкарлиқ қуруп, хитайниң тор дунясиға болған тәһдитигә тақабил туридикән.

Риши сунак йәнә уйғурларниму тилға елип, “улар өзлириниң хәлқигә, җүмлидин шинҗаң вә хоңкоңда тән җазаси берип, қамап, вә меңисини ююп, уларниң кишилик һоқуқиға хилаплиқ қилмақта” дегән. Лекин таратқуларниң ейтишичә, риши сунакниңюқириқи мәйдани униң өткән йили 7-айда қилған сөзлиригә пүтүнләй зит икән. У шу қетимлиқ сөзидә хитай билән “биз пишқан вә тәңпуң мунасивәт қурушимиз керәк” дегән. Униң риқабәтчиси болған лиз трус хитайға қарита техиму қаттиқ қол болуп, әнглийәдики таратқулар униң баш министирлиққа сайланса уйғур ирқий қирғинчилиқини етирап қилидиғанлиқини ейтқанлиқини билдүргән иди.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.