Әнглийә таратқулири әнглийә һөкүмитини уйғур дияридики еғир тәқибләргә диққәт қилишқа чақирди

Мухбиримиз қутлан
2018-07-30
Елхәт
Пикир
Share
Принт

Бүгүн әнглийәдә чиқидиған «мунбәр» тор гезитидә «хитайдики ирқчилиққа толған сақчи дөлити: шинҗаңдики уйғурларниң бастурулуши» намлиқ хәвәр елан қилинған.

Хәвәргә «хитайниң шинҗаңда йүргүзүватқан қаттиқ қол бастуруш тәдбирлирини тосушта бүйүк британийәниңму мәсулийити бар» дәп қошумчә мавзу қоюлған.

Хәвәрдә әнглийәниң йеңи ташқи ишлар министири җереми һантниң нөвәттә хитай зияритидә болуватқанлиқи, сода вә хәлқара бихәтәрлик мәсилисиниң шәксизки униң зиярәт темисиниң бири болидиғанлиқи, әмма униң хитай зиярити давамида чоқум уйғурларниң күнсайин яманлишип бериватқан кишилик һоқуқ дәпсәндичиликлирини тилға елишқа җасарәт көрситиши лазимлиқи оттуриға қоюлған.

Хәвәрдә хитайниң әнглийә ташқи ишлар министирлиқи тизимликкә киргүзгән «30 кишилик һоқуқ мәсилиси нуқтилиқ мәсилә сүпитидә тилға елинидиған дөләт» ләрниң бири икәнлики, 2017-йилидин буян хитайдики кишилик һоқуқ вәзийитиниң барғансери начарлашқанлиқи тилға елинған.

Хәвәрдә йәнә уйғур аптоном райониниң хитайдики әң чоң мәмурий район икәнлики, хитай хәлқ җумһурийити бу районни 1949-йилидин буян идарә қилип кәлгән болсиму, әмма уйғурларниң мәдәнийәт вә миллий кимлик җәһәттин тамамән пәрқлиқ бир хәлқ икәнликини, уларниң өз диярини шәрқий түркистан дәп билидиғанлиқи көрситип өтүлгән.

Хәвәрдә йәнә уйғур дияридики йиғивелиш лагерлири тилға елинип, нөвәттә бир милйондәк кишиниң бу лагерларға қамалғанлиқи, қаранчуқсиз қалған балиларниң дарилтамларға йоллиниватқанлиқи тилға елинған.

Хәвәрниң ахирида сабиқ баш министир дәйвид камерон дәвридин буян әнглийәниң хитай сәһнигә елип чиққан «бир бәлвағ, бир йол» қурулушиға җәмий 750 милйон фонд-стерлиң мәбләғ салғанлиқи, шуңа хитайниң уйғур аптоном районида йүргүзүватқан ирқчил сақчи дөлити сияситини тосушта әнглийәниң баш тартип болмайдиған мәсулийитиниң барлиқи алаһидә тәкитләнгән.

Пикирләр (0)
Share
Толуқ бәт