En'gliye taratquliri en'gliye hökümitini Uyghur diyaridiki éghir teqiblerge diqqet qilishqa chaqirdi

Muxbirimiz qutlan
2018-07-30
Élxet
Pikir
Share
Print

Bügün en'gliyede chiqidighan "Munber" tor gézitide "Xitaydiki irqchiliqqa tolghan saqchi döliti: shinjangdiki Uyghurlarning basturulushi" namliq xewer élan qilin'ghan.

Xewerge "Xitayning shinjangda yürgüzüwatqan qattiq qol basturush tedbirlirini tosushta büyük britaniyeningmu mes'uliyiti bar" dep qoshumche mawzu qoyulghan.

Xewerde en'gliyening yéngi tashqi ishlar ministiri jérémi hantning nöwette xitay ziyaritide boluwatqanliqi, soda we xelq'ara bixeterlik mesilisining sheksizki uning ziyaret témisining biri bolidighanliqi, emma uning xitay ziyariti dawamida choqum Uyghurlarning künsayin yamanliship bériwatqan kishilik hoquq depsendichiliklirini tilgha élishqa jasaret körsitishi lazimliqi otturigha qoyulghan.

Xewerde xitayning en'gliye tashqi ishlar ministirliqi tizimlikke kirgüzgen "30 Kishilik hoquq mesilisi nuqtiliq mesile süpitide tilgha élinidighan dölet" lerning biri ikenliki, 2017-yilidin buyan xitaydiki kishilik hoquq weziyitining barghanséri nacharlashqanliqi tilgha élin'ghan.

Xewerde yene Uyghur aptonom rayonining xitaydiki eng chong memuriy rayon ikenliki, xitay xelq jumhuriyiti bu rayonni 1949-yilidin buyan idare qilip kelgen bolsimu, emma Uyghurlarning medeniyet we milliy kimlik jehettin tamamen perqliq bir xelq ikenlikini, ularning öz diyarini sherqiy türkistan dep bilidighanliqi körsitip ötülgen.

Xewerde yene Uyghur diyaridiki yighiwélish lagérliri tilgha élinip, nöwette bir milyondek kishining bu lagérlargha qamalghanliqi, qaranchuqsiz qalghan balilarning dariltamlargha yolliniwatqanliqi tilgha élin'ghan.

Xewerning axirida sabiq bash ministir deywid kaméron dewridin buyan en'gliyening xitay sehnige élip chiqqan "Bir belwagh, bir yol" qurulushigha jem'iy 750 milyon fond-stérling meblegh salghanliqi, shunga xitayning Uyghur aptonom rayonida yürgüzüwatqan irqchil saqchi döliti siyasitini tosushta en'gliyening bash tartip bolmaydighan mes'uliyitining barliqi alahide tekitlen'gen.

Toluq bet