En'gliye parlamént ezaliri Uyghurlarning lagérgha qamilish mesilisini herqachan tekitleydighanliqini bildürdi

Muxbirimiz eziz
2019-07-30
Élxet
Pikir
Share
Print

Uyghur diyaridiki milyonlighan kishining lagérlargha qamilishi hemde meschit, qebristanliqlarning chéqip tashlinishi toghrisida bir qisim alimlar "Bu hadisiler sépi özidin qirghinchiliq, héchbolmighanda bularni medeniyet qirghinchiliqi, dep atash kérek" dégen pikirlerni otturigha qoyuwatqanliqi melum. Mushu hepte en'gliye parlaméntining bir qisim ezaliri mexsus maqale élan qilip bu ehwalni testiqlaydighanliqini hemde özlirining dawamliq en'gliye parlaméntida Uyghurlar mesilisini tekitleydighanliqini bildürdi.

En'gliyediki "Yéngi bayanatchi" gézitining 26-iyul sanigha bésilghan bu heqtiki bash maqalida en'gliye parlaméntida tesis qilin'ghan "Shinjangdiki diniy étiqad erkinlikini tekshürgüchi barche partiye guruppiliri" komitétining re'isliri, en'gliye parlaméntining ezaliridin yasimen qureyish we alistar karmaykil bu pikirlerni tepsiliy sherhilidi.

Maqalida körsitilishiche, en'gliye bilen xitayning soda munasiwiti en'gliye hökümiti üchün salmaqliq mesililerning biri iken. 2017-Yilining özidila en'giliyening omumiy import qimmitining yette pirsenti xitay bilen bolghan soda munasiwitidin kelgen. Gerche xitay bilen bolghan iqtisadiy alaqe en'gliye üchün bekmu zor ehmiyetke ige bolsimu en'gliye hökümiti xitayning Uyghurlarni lagérgha qamash qilmishini eyiblesh bayanatigha dadilliq bilen imza qoyghan. Aptorlar bu heqte söz qilip "Bizning siyasiy jehettiki hemkarliqimiz we öz'ara menpe'et yetküzüsh herikitimiz bizning ezeliy qimmet qarishimizni qurban qilsa bolmaydu. Chünki bu xil qimmetni payxan qilish qilmishi shinjangda köplep yüz bériwatidu" déyilidu.

Aptorlar axirida bu mesililerning en'gliye parlaméntidiki türlük yighinlarda, guwahliq pa'aliyetliride we mutexessislerning qatnishishidiki muhakime yighinlirida dawamliq halda tekitlinip turushi lazimliqini, özliriningmu buninggha küch chiqiridighanliqini bildüridu.

Toluq bet