Әнглийәдики чоң карханилар хитай билән мунасивитини үзмәкчи болған

Мухбиримиз җәвлан
2022.08.01
Share on WhatsApp
Share on WhatsApp

Хитай билән ғәрб әллириниң мунасивити яманлишип қалған бу вәзийәттә әнглийәдики чоң карханилар хитай билән болған мунасивитини үзмәкчи болған.

Әнглийә бирләшмә агентлиқиниң хәвиридә ейтилишичә, әнглийә санаәтчиләр бирләшмиси рәиси тони дәнкер (Tony Danker) әнглийәдики миңлиған карханичиларниң нөвәттә хитайға болған өчмәнликниң күчийип кәткәнликини көздә тутуп, тәминләш линийәсини башқа дөләттин издәшни ойлишиватқанлиқини билдүргән; арқидин “хитайдин келидиған тәминләш зәнҗирини үзүветип, уни қайта бәрпа қилиш әнглийәниң турмуш чиқимини өрлитиветиши мумкин” дәп агаһландурған.

У йәнә мундақ дегән: “һазир сиясәтчиләр хитайдин айрилған бир дуня тәртипи қурушқа тиришиватиду. Әгәр хитайни чиқиривәтсәк, әнглийә явропа иттипақиға охшаш кона шерикигә моһтаҗ болиду. Болмиса тәминләш қиммәткә тохтап кетиду. Әнглийә дуня миқясида йеңи истратегийәлик иттипақниң қурулушиға моһтаҗ. Америкаму хитайдин қутулуш үчүн карханиларниң бәрдашлиқ бериш вә маслишиш күчини музакирә қиливатиду”.

Тони дәнкерниң қаришичә, әнглийәдә сайламға чүшкән һәр икки партийә намзати әнглийә сода истратегийәси түзүшниң зөрүрлүкини билидиған сиясийонлар икән. Дуняниң һава килиматини қоғдаш вә йешил мәһсулат ишләпчиқириш җәһәттин болсун, хитайниң завутлиридин ваз кечиш әнглийәниң иқтисадий мәнпәәти вә дуня муһитиниң яхшилиниши үчүнму пайдилиқ икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.