En'gliyediki chong karxanilar xitay bilen munasiwitini üzmekchi bolghan
2022.08.01
Xitay bilen gherb ellirining munasiwiti yamanliship qalghan bu weziyette en'gliyediki chong karxanilar xitay bilen bolghan munasiwitini üzmekchi bolghan.
En'gliye birleshme agéntliqining xewiride éytilishiche, en'gliye sana'etchiler birleshmisi re'isi toni denkér (Tony Danker) en'gliyediki minglighan karxanichilarning nöwette xitaygha bolghan öchmenlikning küchiyip ketkenlikini közde tutup, teminlesh liniyesini bashqa dölettin izdeshni oylishiwatqanliqini bildürgen؛ arqidin “Xitaydin kélidighan teminlesh zenjirini üzüwétip, uni qayta berpa qilish en'gliyening turmush chiqimini örlitiwétishi mumkin” dep agahlandurghan.
U yene mundaq dégen: “Hazir siyasetchiler xitaydin ayrilghan bir dunya tertipi qurushqa tirishiwatidu. Eger xitayni chiqiriwetsek, en'gliye yawropa ittipaqigha oxshash kona shérikige mohtaj bolidu. Bolmisa teminlesh qimmetke toxtap kétidu. En'gliye dunya miqyasida yéngi istratégiyelik ittipaqning qurulushigha mohtaj. Amérikamu xitaydin qutulush üchün karxanilarning berdashliq bérish we maslishish küchini muzakire qiliwatidu”.
Toni denkérning qarishiche, en'gliyede saylamgha chüshken her ikki partiye namzati en'gliye soda istratégiyesi tüzüshning zörürlükini bilidighan siyasiyonlar iken. Dunyaning hawa kilimatini qoghdash we yéshil mehsulat ishlepchiqirish jehettin bolsun, xitayning zawutliridin waz kéchish en'gliyening iqtisadiy menpe'eti we dunya muhitining yaxshilinishi üchünmu paydiliq iken.