Әнглийә парламент әзалири ички ишлар министириға хәт йезип, уйғурларға аптоматик панаһлиқ беришни тәләп қилған

Мухбиримиз әркин
2020-08-07
Елхәт
Пикир
Share
Принт

Әнглийә парламенти авам палатасиниң 44 нәпәр әзаси әнглийә ички ишлар министириға хәт йезип, әнглийәгә келип сиясий панаһлиқ тилигән уйғурларға аптоматик мусапирлиқ салаһийити берилишини тәләп қилған. Парламент әзалириниң хетидә көплигән дәлилләр уйғурларға ирқий қирғинчилиқ йүргүзүлүватқанлиқини көрситиватқанлиқи тәкитләнгән. Мәзкур хәтни әнглийә авам палатасиниң либерал демократлар партийәсидин болған әзаси прити пәтил қәләмгә алған. Униңға консерватиплар партийәси, ишчилар партийәси, йешиллар вә шотландийә миллий партийәси қатарлиқ 4 партийәниң 44 нәпәр парламент әзаси имза қойған.

Униңда һөкүмәтниң «хитайниң диний зиянкәшликидин қечип кәлгән барлиқ уйғурларға аптоматик мусапирлиқ салаһийити беридиғанлиқини алаһидә елан қилиши» тәләп қилинған. Әнглийә «муһапизәтчи» гезитиниң хәвәр қилишичә, әнглийә либерал демократлар партийәсиниң ташқи ишлар баянатчиси, парламент әзаси алистер кармекал: «әнглийәгә келип панаһлиқ тилигән уйғурларниң өз кәчмишини испатлиши һаҗәтсиз. Чүнки, дәлилләр наһайити ениқ. Ички ишлар министири тәдбир қоллинип, һоқуқиниң қәбиһләрчә бастурулушидин қечип кәлгән барлиқ уйғурларға аптоматик мусапирлиқ салаһийити бериши керәк» дегән.

Өткән йили явропада шветсийә һөкүмити хитайдин келип сиясий панаһлиқ тилигән барлиқ уйғурларға мусапирлиқ салаһийити беридиғанлиқини елан қилған. Охшаш бир вақитта йәнә германийә һөкүмитиму уйғурларни хитайға қайтурмайдиғанлиқини җакарлиған. Бу явропадики башқа һөкүмәтләрниңму шветсийәни үлгә елип, уйғурларға мусапирлиқ салаһийити бериш тоғрисидики чақириқларға сәвәб болғаниди.

Пикирләр (0)
Share
Толуқ бәт