En'giliye parlamént ezasi Uyghur mesilisi seweblik xitayning b d t kishilik hoquq kéngishige eza bolushini tosushni telep qildi

Muxbirimiz erkin
2020-10-12
Share

En'giliye parlaméntining ishchilar partiyesidin bolghan ezasi, parlamént tashqiy ishlar we tereqqiyat komitétining mes'uli lisa nandi en'giliye tashqiy ishlar ministirigha xet yézip, en'giliyening Uyghurlar seweblik xitayning b d t kishilik hoquq kéngishige eza bolushini tosushni telep qilghan. Uning tekitlishiche, xitay "B d t ning shinjangda sadir boluwatqan insaniyetke qarshi jinayetlerni tekshürüshige yol qoyushi kérek," iken.

En'giliyede chiqidighan "Közetküchi" gézitining xewer qilishiche, lisa nandi "Ishchilar partiyesi hökümetni buninggha yol qoyulmighiche xitayning kishilik hoquq kéngishige eza bolushigha qarshi turushni chaqiridu," digen. U yene xitayning "Shinjangdiki Uyghurlargha tutqan mu'amilisining insaniyetke qarshi jinayet" ikenliki, xitayning herkiti "1948-Yili maqullan'ghan ehdinamidiki 'irqiy qirghinchiliq' alahidiliklirige ige" ikenlikini tekitligen.

U mundaq dégen: "Siz we herqandaq adem xelq'ara qanunning muhimliqini, bundaq dehshetke süküt qilishning uninggha shérik bolush dep qarilidighanliqini bilidu. En'giliye bu pursetni ghenimet bilip, Uyghurlargha yardem qilishi, dunyaning her qaysi jaylirida kishilik hoquqni qoghdash üchün bizning yenila ishenchilik ikenlimizni namayen qilishi kérek." en'giliye tashqiy ishlar ministiri dominik rab ötken hepte "Eger téximu köp deliller otturigha chiqsa, en'giliyening béyjing qishliq olimpik musabiqisini bayqut qilishi mumkinliki" ni bildürgen idi.

Lékin lisa nandining tekitlishiche, "Bu xil ipade rayondiki keng kölemlik tutqun, mejburiy tughmas qilish, qul emgikige a'it deliller" aldida yéterlik emes iken. U en'giliye hökümitining choqum heriketke kélip, b d t ning Uyghur diyarida derhal shertsiz tekshürüsh élip bérishigha yétekchilik qilishi kéreklikini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.