Әнглийә парламенти уйғур қирғинчилиқи һәққидә муназирә өткүзмәкчи

Мухбиримиз әзиз
2021-11-19
Share

Әнглийә парламентиниң юқири палатаси 25-ноябир күни уйғур қирғинчилиқи һәққидә муназирә өткүзидиған болуп, бу һәқтики тәпсилатлар улар елан қилған йиғин хатирисидә баян қилинди.

Йиғин хатирисидә ейтилишичә, 25-ноябир күни юқири палатада өткүзүлидиған уйғур қирғинчилиқи темисидики муһакимидә әнглийә ташқи ишлар вәзириниң "уйғурлар қирғинчилиққа дуч келиватиду" дегән мәзмундики язма баянати асасида уйғурлар дуч келиватқан реаллиқни "қирғинчилиқ" дәп аташ яки атимаслиқ һәққидә қарар елинидикән. "дәвр" журнилиниң 1-ноябир күнидики хәвиридә ейтилишичә, әнглийә ташқи ишлар вәзири елзабет трус 2020-йили әнглийәниң дөләт ишлири вәзири болуватқан вақитлардила хитай һөкүмитини уйғурларни қирғин қилғанлиқта әйиблигәникән. Шу вақитта у "бизниң фирансийәгә тутқан муамилимиз хитайға тутқан муамилимизгә охшимайду. Чүнки фирансийә хитайға охшаш қирғинчилиқ билән мәшғул болғини йоқ" дегән икән. Әнглийә парламенти қирғинчилиқниң бәш түрлүк тәбириниң уйғурлар дуч келиватқан реаллиқтин толуқ тепилидиғанлиқини алаһидә тәкитлигән болсиму, әнглийә һөкүмити һазирғичә бу қилмишни "қирғинчилиқ" дәп етирап қилмиған.

Бу қетимқи муназирә һәққидә чиқирилған йиғин хатирисидә бирләшкән дөләтләр тәшкилати (б д т) елан қилған қирғинчилиқниң тәбирлири қисқичә шәрһлиниш билән биргә хитай һөкүмитиниң дәл мушу қирғинчилиқ қилмишлирини уйғур диярида иҗра қиливатқанлиқи алаһидә тәкитлиниду. Шуниңдәк австралийә истратегийәлик тәтқиқат институтиниң уйғурлар һәққидики доклатлири, уйғур сот коллегийәсиниң сот гуваһлиқ материяллири, хәлқара җинайи ишлар сот мәһкимисиниң хитай һәққидики баянатлири, б д т ниң мунасивәтлик доклатлири қатарлиқларни әсләп ‍өтүш билән биргә әнглийә һөкүмитиниң уйғур қирғинчилиқини етирап қилмиғанлиқи тәнқидлиниду. Шуниңдәк әнглийә парламентиниң юқири вә төвән палата әзалириниң уйғур қирғинчилиқи һәққидики баянатлири хуласилинип, әнглийә һөкүмитини уйғур қирғинчилиқи һәққидә адил қарар елишқа дәвәт қилиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт