En'gliye parlaménti Uyghur qirghinchiliqi heqqide munazire ötküzmekchi

Muxbirimiz eziz
2021-11-19
Share

En'gliye parlaméntining yuqiri palatasi 25-noyabir küni Uyghur qirghinchiliqi heqqide munazire ötküzidighan bolup, bu heqtiki tepsilatlar ular élan qilghan yighin xatiriside bayan qilindi.

Yighin xatiriside éytilishiche, 25-noyabir küni yuqiri palatada ötküzülidighan Uyghur qirghinchiliqi témisidiki muhakimide en'gliye tashqi ishlar wezirining “Uyghurlar qirghinchiliqqa duch kéliwatidu” dégen mezmundiki yazma bayanati asasida Uyghurlar duch kéliwatqan ré'alliqni “Qirghinchiliq” dep atash yaki atimasliq heqqide qarar élinidiken. “Dewr” zhurnilining 1-noyabir künidiki xewiride éytilishiche, en'gliye tashqi ishlar weziri élzabét trus 2020-yili en'gliyening dölet ishliri weziri boluwatqan waqitlardila xitay hökümitini Uyghurlarni qirghin qilghanliqta eyibligeniken. Shu waqitta u “Bizning firansiyege tutqan mu'amilimiz xitaygha tutqan mu'amilimizge oxshimaydu. Chünki firansiye xitaygha oxshash qirghinchiliq bilen meshghul bolghini yoq” dégen iken. En'gliye parlaménti qirghinchiliqning besh türlük tebirining Uyghurlar duch kéliwatqan ré'alliqtin toluq tépilidighanliqini alahide tekitligen bolsimu, en'gliye hökümiti hazirghiche bu qilmishni “Qirghinchiliq” dep étirap qilmighan.

Bu qétimqi munazire heqqide chiqirilghan yighin xatiriside birleshken döletler teshkilati (b d t) élan qilghan qirghinchiliqning tebirliri qisqiche sherhlinish bilen birge xitay hökümitining del mushu qirghinchiliq qilmishlirini Uyghur diyarida ijra qiliwatqanliqi alahide tekitlinidu. Shuningdek awstraliye istratégiyelik tetqiqat institutining Uyghurlar heqqidiki doklatliri, Uyghur sot kollégiyesining sot guwahliq matériyalliri, xelq'ara jinayi ishlar sot mehkimisining xitay heqqidiki bayanatliri, b d t ning munasiwetlik doklatliri qatarliqlarni eslep ‍ötüsh bilen birge en'gliye hökümitining Uyghur qirghinchiliqini étirap qilmighanliqi tenqidlinidu. Shuningdek en'gliye parlaméntining yuqiri we töwen palata ezalirining Uyghur qirghinchiliqi heqqidiki bayanatliri xulasilinip, en'gliye hökümitini Uyghur qirghinchiliqi heqqide adil qarar élishqa dewet qilidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet