Туңган шаир әнрән хитай дөләт аманлиқ хадимлири тәрипидин тутуп кетилгән вә икки күндә қоюветилгән

Мухбиримиз ирадә
2018-11-29
Елхәт
Пикир
Share
Принт

Йеқиндин буян уйғур елидики лагерларни вә хитай һөкүмитиниң ислам диниға қиливатқан бесими һәққидики әндишилирини көпләп тилға еливатқан туңган шаирлардин әнрән 27-ноябир күни җинәндики өйидә хитай дөләт аманлиқи хадимлири тәрипидин тутқун қилинған.

Униң тутқун қилинишиға униң тивиттердики уйғур елидики лагерлар һәққидики язмилири сәвәб болған икән. Радийомизниң телефон арқилиқ игилишичә, дөләт аманлиқ даирилири уни икки күн сорақ қилғандин кейин 29-ноябир күни қоюп бәргән.

Хитай даирилири уни бу йил 8-айдиму бир аварә қилған иди. 16-Авғуст күни хитай бихәтәрлик хадимлири униң өйигә келип, ән рәнни торларға уйғур елидики лагерлар вә тутқун қилиш һәрикәтлири һәққидә қалаймиқан билҗирлимаслиқ һәққидә агаһландуруш бәргән.

Әйни чағда америка қәләмкәшләр җәмийити буниңдин хәвәрдар болғандин кейин җиддий инкас қайтуруп: «хитай даирилири ән рәндәк бир шаир инсан һәқлири мәсилисини оттуриға қойғанда униңға тәһдит селишниң орниға униң гепигә қулақ селиши лазим иди» дегән.

Бүгүн радийомиз мухбирлири җинән шәһәрлик сақчи органлириға бу һәқтә телефон қилған болсиму, улар әнрәнниң тутқун қилиниши һәққидики соалларға җаваб беришни рәт қилған.

Пикирләр (0)
Share
Толуқ бәт