Әрдоған назарбайефни "түрк дунясиниң ақ сақили" дәп атиди

Мухбиримиз үмидвар
2015-04-18
Share


Түркийә президенти рәҗәп тайип әрдоған 16—априлдин 18 - априлғичә қазақистан җумһурийитидә үч күнлүк дөләт зияритидә болғанда қазақистан президенти нурсултан назарбайефни "түрк дунясиниң ақ сақили" дәп атиған.

Қазақистанниң "тәңри хәвәр агентлиқи"ниң тарқатқан учурида қәйт қилинишичә тайип әрдоған нурсултан назарбайефниң икки дөләт мунасивәтлириниң тәрәққиятиға қошқан төһписигә юқири баһа бәргән.

Мәлумки, түркийә һөкүмити 2010 - йили, 24 - июн күни әнқәрә шәһиригә назарбайефниң пүтүн түркий хәлқләр үчүн қилған хизмәтлиригә һөрмәт билдүрүш вә етирап қилиш нуқтисидин униң һәйкилини орнатқан иди.

Әрдоған билән назарбайеф әтиси бирликкә қазақистанниң түркистан шәһиригә берип, әхмәт йәсәви мазирини тавап қилди.

Әрдоған йәнә қазақ дөлити қурулғанлиқиниң 550 йиллиқини тәбриклиди.

"қазақистан бүгүн" гезитиниң хәвәр қилишичә, рәҗәп тайип әрдоған әхмәт йәсәви намидики түркийә - қазақистан хәлқара университетини зиярәт қилип, оқутқучи - оқуғучилар билән учрашқан һәмдә әхмәт йәсәви университет униңға пәхрий профессорлуқ унвани бериш мурасими өткүзгән, бу мурасимда нурсултан назарбайефму биргә болған иди.

Қазақистан мәтбуатлирида әрдоғанниң әхмәт йәсәви университетида сөз қилғанлиқи вә униң икки дөләт һәмкарлиқиға юқири баһа бәргәнлики, әрдоған билән назарбайефниң түркийәниң мәблиғи билән селинған әхмәт йәсәви мәсчитиниң ечилиш мурасимиға қатнашқанлиқи һәм башқа бир қатар дағдуғилиқ әһваллар һәққидә тушму - туштин хәвәр тарқатти.

Түркийә трт уйғур бөлүминиң хәвәр қилишичә, рәҗәп тайип әрдоған әхмәт йәсәви университетида қилған сөзидә "шәрқий түркистан"ни тилға алған болуп, "бирма вә шәрқий түркистандин келиватқан хәвәрләр бизләрни әндишиләндүриду" дәп әскәрткән.

Әрдоған сөзидә түрк дунясиниң ортақ мәдәнийәт мираслири вә башқа нуқтиларни тәкитләп," ортақ мәдәнийәт тарихимиздин алған бу мирасни кәлгүси әвладларға йәткүзүш вәзипмиздур" дәп әскәрткән

Шуни әскәртиш керәкки, нөвәттә қазақистан түркийәниң мәркизий асиядики әң сода шерики болуп, уларниң сода миқдарини йеқин кәлгүсидә 10 милярд долларға йәткүзүш вәдә қилинмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт