Sofi richardson erkin tuniyazning "Anardek danisidek zich uyushqan" dégen teshwiqat sözini qattiq tenqid qildi

Muxbirimiz irade
2019-06-27
Élxet
Pikir
Share
Print

Jenwede bashlan'ghan birleshken döletler teshkilati kishilik hoquq kéngishining 41-nöwetlik yighinining ikkinchi künide Uyghur aptonom rayonluq hökümetning mu'awin re'isi erkin tunyaz doklat bérip, xitay hökümitining Uyghur élida yolgha qoyuwatqan qattiq basturush siyasetlirini we lagér tüzümini aqlighan. Ü sözide "Shinjangdiki her millet xelqi barawer, ittipaq, inaq bolup, anarning danisidek zich uyushti" dégen ibarilerni qollan'ghan idi.

Erkin tuniyaz doklat bergen shu küni amérika hökümitining jenwediki birleshken döletler teshkilati we bashqa xelq'araliq organlarda turushluq elchiliki bayanat élan qilip, erkin tuniyazgha söz qilish pursiti bergen b d t kishilik hoquq kéngishini qattiq tenqidligen.

Halbuki, xitayning "Xelq tori" qatarliq hökümet taratquliri erkin tuniyazning shu künidiki doklat ehwalini keng teshwiq qilip, uning b d t diki bu nutuqining alqishqa érishkenlikini ilgiri sürgen. "Xelq tori" bu heqtiki xewiride "Her qaysi terepler erkin tuniyazning sözige yuqiri baha bérip, nutuqtin shinjangning ehwaligha bolghan chüshenchisining chongqurlashqanliqini bildürdi," dep yazghan.

Emeliyette erkin tuniyazning shu künidiki sözi közetküchilerning tenqidige uchrimaqta. Xelq'ara kishilik hoquqni közitish teshkilatining xitay ishliri diréktori sofi richardson 26-iyun küni bu heqte élan qilghan mexsus bayanatida erkin tuniyazning shu künidiki sözlirini "Bashtin-ayaq nomussizlarche qilin'ghan bir yalghanchiliq we quruq teshwiqat, xalas" dégen.

U bayanatida erkin tuniyazning shu künidiki sözide xelq'aradiki ilmiy tetqiqatchilar, diplomatlar, zhurnalistlar, b d t mutexessisliri we shundaqla kishilik hoquqni közitish teshkilati qatarliq kishilik hoquq organliri algha sürgen pakit we endishilerge qarita birer éghizmu jawab bérilmigenlikini tenqid qildi. Sofi richardson yene erkin tuniyazning sözining bir qismini Uyghurche tekrarlishighimu baha bérip "Erkin tuniyazning shinjang Uyghur aptonom rayonidiki xizmetdashliri Uyghur tilida sözleshtin chekliniwatqan bir shara'itta, uning b d t kishilik hoquq kéngishide sözining bir qismini Uyghur tilida sözlishi tolimu külkilik. . . Erkin tuniyaz sözide her millet xelqi anarning danisidek zich uyushqanliqini ilgiri sürdi, emma xitay hökümitining némishqa bu kishilerni shunche qattiq nazaretke alidighanliqigha jawab bermidi," dédi.

Sofi xanim bayanatida birleshken döletler teshkilatigha eza döletlerni xitay hökümitining Uyghur élida yürgüzüwatqan siyasetliri üchün jawabkarliqqa tartishqa yene bir qétim dewet qilghan.

Toluq bet