Мухбирларни қоғдаш комитети әркин турсунниң қоюп берилишини тәләп қилған

Мухбиримиз җәвлан
2021-04-20
Share

9-Апрел күни хитай даирилири 2018-йил тутулуп кәткән телевизийә мухбири әркин турсунниң видийосини көрсәткән болуп, хитайниң тәшвиқати үчүн сөзләшкә мәҗбур болған әркин турсун һеч болмиғанда өзиниң һаят икәнликидин учур бәргәниди.

Йеқинқи мәзгилдин буян хитайниң хәлқара бесимға қарши тәшвиқат уруши қанат яйдуруп, бәднам-төһмәтләр билән тутулғанларни гуваһлиққа тартип, ялған пакит ойдуруп өзини ақлашқа урунғанлиқи көпләп ашкарилиниватқан болуп, әркин турсунниңму "миллий өчмәнлик вә миллий кәмситишкә қутратқулуқ қилғанлиқ җинайити" түпәйлидин 20 йиллиқ кесилгәнлики, "өз ағзи билән җинайитини иқрар қилип, өзини өзгәртип һөкүмәтниң кәңчиликигә еришмәкчи болғанлиқи" тәшвиқ қилинған.

19-Апрел мухбирларни қоғдаш комитети, хитай даирилириниң әркин турсунни дәрһал қоюп бериши, бундақ ахбарат хадимидин ялған тәшвиқат үчүн пайдиланмаслиқи керәкликини билдүргән. Мәзкур комитет асия ишлири бөлүминиң маслаштурғучиси стевин батлир мундақ дегән: "хитай һөкүмитиниң әркин турсундәк бир мухбирни тутуп, униңдин тәшвиқат үчүн пайдилиниши наһайити қәбиһ вә рәзил усулдур. Хитай әгәр инсанпәрвәр болалиса, әркин турсун вә башқа мухбирларни дәрһал қоюп бериши, уларниң аилә әзалирини паракәндә қилишни тохтитиши керәк".

Мухбирларни қоғдаш комитети хитай ташқи ишлар министирлиқи вә хитай йәр шари телевизийә қанили (CGNT) ға бу һәқтә хәт язған болсиму һечқандақ җаваб алалмиған. Мәзкур комитетниң өткән йил 1-декабир елан қилишичә, хитайда тутқун қилинған мухбирлар 47 гә йәткән болуп, хитай бу йилиму дуня бойичә мухбирлар әң көп қамалған начар дөләт һесабланған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт