Erkinlik sariyining xitayni “Erkin bolmighan dölet” katégoriyesige kirgüzüshi diqqet qozghidi

Amérikidiki kishilik hoquq teshkilatliridin erkinlik sariyi 28-yanwar charshenbe küni 2014-yilliq doklatini élan qildi. “Démokratiyedin waz kéchip mustebitlikke qaytish”namliq doklatta xitayning “Erkin bolmighan dölet” katégoriyesige kirgüzülüshi diqqet qozghidi.

Tünügün doklat élan qilin'ghandin kéyin, bügün köpligen xelq'ara axbarat organliri mezkur doklat heqqide xewer we inkaslarni berdi. Melum bolushiche, doklatta 195 dölet we rayon ichide, 89 dölet “Erkin dölet” katégoriyesige, 55 dölet “Qismen erkin dölet” katégoriyesige, shimaliy koréye, xitay qatarliq döletler “Erkin bolmighan dölet” qatarigha kirgüzülgen.

Amérika awazi, roytérs, b b s agéntliqi qatarliqlarning 29-yanwar bergen xewerliride, mezkur doklatta tilgha élin'ghan, 2014-yili dunyaning her qaysi jayliridiki erkinlik keypiyatining 2013-yildikige qarighanda téximu nacharlashqanliqi, doklatning xitay heqqidiki qismida xitay hélihem “Erkin bolmighan dölet” qatarigha kiridighanliqi, xitaydiki erkinlik keypiyatining barghanche nacharlap ketkenliki qatarliq mezmunlar alahide tilgha élin'ghan.