Érlandiyedimu Uyghurlardiki mejburiy emgekni cheklesh chaqiriqi otturigha chiqti

Uyghur diyaridiki basturush we teqibning biwaste halda ghayet zor kölemdiki mejburiy emgekke seweb boluwatqanliqi tashqi dunyagha köplep melum bolghandin kéyin herqaysi chong shirketler we xelq'araliq dangliq marka sahibliri özlirining bu qebih qilmishqa qarshi turidighanliqini bildürgen idi. Yéqinda Uyghur mesiliside anche köp ipade bildürüp baqmighan yawropa döletliridin érlandiyedimu Uyghur diyaridiki mejburiy emgekke chétishliq teminat zenjirini qet'i men'i qilish chuqanliri otturigha chiqti.

En'glyede chiqidighan “Waqit” gézitining 9-marttiki xewiride éytilishiche, érlandiye parlaméntining ezaliridin kasérin kannoliy xanim érlandiye maliye minisitrlikige mektup yollap mezkur ministirlik qarmiqidiki “Érlandiye istratégiyilik meblegh fondi” ning Uyghurlar diyaridiki mejburiy emgek bilen yaki bashqa halqilar bilen qaysi derijide munasiwetlik ikenlikini sürüshte qilghan. Érlandiye maliye ministiri paskal donoxé bu so'algha yazma jawap qayturup, mezkur meblegh fondining Uyghur diyaridiki bir qisim zawutlar bilen hemkarliq alaqisi barliqini, emma bu hemkarliqning mejburiy emgek bilen chétishliq yaki emesliki hazirche namelum ikenlikini, özlirining bu mesilini jiddiy tekshürüshke buyrughanliqini bildürgen.

Melum bolushiche, “Érlandiye istratégiyilik meblegh fondi” érlandiyediki eng chong soda shirkiti bolup, érlandiyening chet'ellerdiki meblegh sélish türliri herqachan mushu shirket arqiliq emelge ashidiken.