Lu'isa gréf: "Xitayning Uyghurlarni basturush qilmishi irqiy qirghinchiliq ölchimige chüshidu"

Muxbirimiz erkin
2018-12-10
Élxet
Pikir
Share
Print

Amérikidiki Uyghur kishilik hoquq qurulushi ning tashqi ishlargha mes'ul diréktori lu'isa gréf 10‏-dékabir "Xongkong erkin axbarati" torida maqale élan qilip, xitaygha yershari xaraktérlik émbargo qoyush arqiliq Uyghur kishilik hoquq krizisige xatime bérishke chaqirghan.

Uning ilgiri sürüshiche, xitay hökümitining Uyghurlarni basturushi b d t "Kishilik hoquq ehdinamisi" ning irqiy qirghinchiliq jinayiti heqqidiki tebirige chüshidiken. Lu'isa gréf b d t "Uniwérsal kishilik hoquq ehdinamisi" we "Irqiy qirghinchiliqning aldini élish, jazalash ehdinamisi" maqullan'ghanliqining 70 yilliqi munasiwiti bilen élan qilghan maqaliside Uyghur jem'iyitining barliq qatlamliridiki kishilerning qéri-yash, er-ayal, sheher-yéza démey lagérlargha qamalghanliqi, da'irilerning Uyghur tili we diniy étiqadini yoqitishni tézletkenliki, bir milyon kompartiye xadimining Uyghur a'ililerge kirip, ularni teqib qiliwatqanliqi, 'ashqunluq xahishi bar' dep qaralghanlarning tutqun qilinidighanliqini bildürgen.

U "Kishilik hoquq küni: xitaygha yer shari xaraktérlik émbargo qoyup, Uyghur kishilik hoquq krizisige xatime bérishning waqti keldi" namliq maqaliside yene xitay hökümitining meqsitige so'al qoyghan. Uning qarishiche, xitay hökümitining qilmishidin uning meqsiti "Uyghurlarning milliy kimlikini, perqliq bir millet bolup mewjut bolup turushini yoqitish dégendin bashqa bir xulasige kélish mumkin emes" iken.

U 10‏-dékabir yene b d t ning "Irqiy qirghinchiliq jinayitining aldini élish we jazalash ehdinamisi" maqullan'ghanliqining 70 yilliq xatire küni ikenliki, mezkur ehdinamide irqiy qirghinchiliqqa tebir bérilgenlikini eskertip, "Xitay hökümitining Uyghurlargha qaratqan hazirqi basturushi bu tebirge chüshidu. Héchqandaq ish bolmighandek heriket qilishqa waqit saqlap turmaydu. Héchqandaq heriket qilmasliq Uyghur xelqining teqdirige biperwaliq qilish bolupla qalmastin, belki yene démokratiyining 21‏-esirde mewjut bolup turushighimu xiris élip kélidu," dégen.

Toluq bet