"әсәбийликни түгитиш низами" елан қилинғандин кейин, уйғур елидә тәшвиқат паалийәтлири уюштурулған

Мухбиримиз җүмә
2017-04-08
Share


Уйғур аптоном район даирилири "әсәбийликни түгитиш низами" ни елан қилғандин кейин, уйғур елиниң һәр қайси җайлирида тәшвиқат паалийәтлирини уюштурушқа башлиған. Тәңритағ ториниң хәвәр қилишичә, уйғур аптоном районлуқ әдлийә назарити хотән наһийәсидә бәш күн мәхсус "әсәбийликни түгитиш" лексийиси уюштурған.

Улар 1-апрелдин 5-апрелғичә, наһийәгә қарашлиқ ханериқ, бағчә йезиси қатарлиқ йезиларда 9 мәйдан лексийә тәшкиллигән.

Лексийәдә "қандақ қилип бир вәтәнпәрвәр, қанунға бойсунидиған пуқра болуш, террорлуққа зәрбә бериш вә муқимлиқ сақлашта аз санлиқ милләт кадирлири қандақ башламчилиқ қилиш" қатарлиқ мәзмунларниң асаслиқ орун игиләнгәнликни диққәтни чекиду.

Мунасивәтлик хәвәрләргә қариғанда, йәнә бу хилдики тәшвиқат паалийәтлири уйғур райондики һәр дәриҗилик маарип саһәсидиму өткән 6 күндин буян изчил давам қилған.

Тәңритағ ториниң бу һәқтики йәнә бир парчә хәвиридә көрситишичә, "әсәбийликни түгитиш низами" ниң 30-баб 12-маддисидики "мәктәпләр оқутқучи-оқуғучиларға қаритилған миллий диний сиясәт тәрбийәсини күчәйтиш, бөлгүнчиликкә қариши турушни күчәйтиш, сиңип киришкә қариши туруш, һәр қандақ тәшкилат вә шәхсниң мунбәрдин пайдилинип, әсәбийлик тәрбийәси елип беришиниң алдини елиш" қатарлиқ мәзмунлар маарип саһәсидикиләргә қаритилған.

Хитай даирилири 29-март аталмиш "әсәбийликни түгитиш низами" ни мақуллап буниң 1-апрелдин башлап күчкә игә икәнликини елан қилған.

50 Маддилиқ мәзкур низамда сақал қоюш өлчәмлири вә диний йосунда кийинишкә қаритилған чәклимиләр көрситилгәндин башқа "радио, телевизийә қатарлиқларни чәткә қеқиш, һалал уқумини кеңәйтиш" қатарлиқларму "әсәбийлик" категорийәсигә киргүзүлгән.

Хитай даирилири бу низамни җәмийәт муқимлиқи бәрпа қилишта пайдилиқ дәп көрсәткән.

Әмма бу һәқтә зияритимизни қобул қилған америка хәлқаралиқ диний әркинлик комитети тәтқиқатчиси тина муффорд ханим бундақ бир тәдбириниң хитай күткәндәк нәтиҗә беришниң орниға уйғур елидә йәниму күчлүк наразилиқларға сәвәб болидиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт