“Esebiylikni tügitish nizami” élan qilin'ghandin kéyin, Uyghur élide teshwiqat pa'aliyetliri uyushturulghan
2017.04.08
Uyghur aptonom rayon da'iriliri “Esebiylikni tügitish nizami” ni élan qilghandin kéyin, Uyghur élining her qaysi jaylirida teshwiqat pa'aliyetlirini uyushturushqa bashlighan. Tengritagh torining xewer qilishiche, Uyghur aptonom rayonluq edliye nazariti xoten nahiyeside besh kün mexsus “Esebiylikni tügitish” léksiyisi uyushturghan.
Ular 1-apréldin 5-aprélghiche, nahiyege qarashliq xan'ériq, baghche yézisi qatarliq yézilarda 9 meydan léksiye teshkilligen.
Léksiyede “Qandaq qilip bir wetenperwer, qanun'gha boysunidighan puqra bolush, térrorluqqa zerbe bérish we muqimliq saqlashta az sanliq millet kadirliri qandaq bashlamchiliq qilish” qatarliq mezmunlarning asasliq orun igilen'genlikni diqqetni chékidu.
Munasiwetlik xewerlerge qarighanda, yene bu xildiki teshwiqat pa'aliyetliri Uyghur rayondiki her derijilik ma'arip sahesidimu ötken 6 kündin buyan izchil dawam qilghan.
Tengritagh torining bu heqtiki yene bir parche xewiride körsitishiche, “Esebiylikni tügitish nizami” ning 30-bab 12-maddisidiki “Mektepler oqutquchi-oqughuchilargha qaritilghan milliy diniy siyaset terbiyesini kücheytish, bölgünchilikke qarishi turushni kücheytish, singip kirishke qarishi turush, her qandaq teshkilat we shexsning munberdin paydilinip, esebiylik terbiyesi élip bérishining aldini élish” qatarliq mezmunlar ma'arip sahesidikilerge qaritilghan.
Xitay da'iriliri 29-mart atalmish “Esebiylikni tügitish nizami” ni maqullap buning 1-apréldin bashlap küchke ige ikenlikini élan qilghan.
50 Maddiliq mezkur nizamda saqal qoyush ölchemliri we diniy yosunda kiyinishke qaritilghan cheklimiler körsitilgendin bashqa “Radi'o, téléwiziye qatarliqlarni chetke qéqish, halal uqumini kéngeytish” qatarliqlarmu “Esebiylik” katégoriyesige kirgüzülgen.
Xitay da'iriliri bu nizamni jem'iyet muqimliqi berpa qilishta paydiliq dep körsetken.
Emma bu heqte ziyaritimizni qobul qilghan amérika xelq'araliq diniy erkinlik komitéti tetqiqatchisi tina mufford xanim bundaq bir tedbirining xitay kütkendek netije bérishning ornigha Uyghur élide yenimu küchlük naraziliqlargha seweb bolidighanliqini bildürdi.