Уйғур яшлири "ешинча әмгәк күчи" дегән намда давамлиқ ичкиригә йөткәлмәктә

Мухбиримиз әзиз
2017-04-19
Share

Йиллардин буян уйғурлар дияри һәққидики муһакимиләрдә изчил муһим темилардин болуп кәлгән әмгәк пурсити һәмдә әмгәк күчи мәсилиси йеқинда йәнә бир қетим кишиләрниң диққитини қозғаватқанлиқи мәлум. "шинҗаң гезити" ниң бүгүнки хәвиридә уйғурлар дияридики қәшқәр вә хотән районида кәлгүси үч йил ичидә 100 миң кишиниң ишқа орунлишиш мәсилиси һәл болидиғанлиқи алаһидә йәр алған.

Хәвәрдә ейтилишичә, уйғурлар дияриниң қәшқәр вә хотән районидики ешинча әмгәк күчлиридин 25 миң деһқан яш бу йил ичидә ишқа орунлишип болидикән һәмдә мушу тәриқидә үч йил ичидә 100 миң деһқан яш иш орниға егә болидикән. Гәрчә хәвәрдә бу ишларниң "хәлқни бай қилиш" мәқситидә ишқа ашидиғанлиқи тәкитләнгән болсиму, бу яшларни қандақ шәкилдә хизмәт орниға егә қилидиғанлиқи һәққидә һечқандақ учур берилмигән.

"хитай хәвәрләр тори" да болса бу хилдики ишқа орунлаштурушниң йәнила илгирикидәк "шинҗаңдики ешинча әмгәк күчлирини йөткәп хизмәт орниға егә қилиш" шәклидә ишқа ашидиғанлиқи тәпсилий баян қилинған. Хәвәрдә ейтилишичә, уйғурлар диярида мушу йилниң биринчи чарикидила деһқан яшлар җәмий 577 миң адәм қетим һәрқайси җайларға йөткәлгән. Булардин 4704 киши ичкиридики карханиларға ишқа орунлашқан болуп, бу санниң өткән йили 19 миңға йеқин болғанлиқи қәйт қилиниду.

Вәзийәт анализчилириниң қаришичә уйғурлар дияридики әң муһим мәсилиләрниң бири дәл уйғурларниң ишсизлиқ мәсилиси болуп, һәр күни миңлиған хитай көчмәнлириниң уйғурлар дияриға көчүп келиши изчил һалда уйғурлар дияридики зиддийәтни күчәйтиватқан амилларниң бири, дәп қариливатқан иди. Мушу сәвәбтин уларниң "уйғурлар диярида уйғур деһқанлар растинила ешинча әмгәк күчи һесабланса у һалда хитай көчмәнлириниң уйғурлар дияриға әмгәк күчи сүпитидә көчүп келиши һаҗәтсиз" дәп қараватқанлиқи мәлум.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт