Uyghur yashliri “Éshincha emgek küchi” dégen namda dawamliq ichkirige yötkelmekte

Muxbirimiz eziz
2017-04-19
Share

Yillardin buyan Uyghurlar diyari heqqidiki muhakimilerde izchil muhim témilardin bolup kelgen emgek pursiti hemde emgek küchi mesilisi yéqinda yene bir qétim kishilerning diqqitini qozghawatqanliqi melum. “Shinjang géziti” ning bügünki xewiride Uyghurlar diyaridiki qeshqer we xoten rayonida kelgüsi üch yil ichide 100 ming kishining ishqa orunlishish mesilisi hel bolidighanliqi alahide yer alghan.

Xewerde éytilishiche, Uyghurlar diyarining qeshqer we xoten rayonidiki éshincha emgek küchliridin 25 ming déhqan yash bu yil ichide ishqa orunliship bolidiken hemde mushu teriqide üch yil ichide 100 ming déhqan yash ish ornigha ége bolidiken. Gerche xewerde bu ishlarning “Xelqni bay qilish” meqsitide ishqa ashidighanliqi tekitlen'gen bolsimu, bu yashlarni qandaq shekilde xizmet ornigha ége qilidighanliqi heqqide héchqandaq uchur bérilmigen.

“Xitay xewerler tori” da bolsa bu xildiki ishqa orunlashturushning yenila ilgirikidek “Shinjangdiki éshincha emgek küchlirini yötkep xizmet ornigha ége qilish” sheklide ishqa ashidighanliqi tepsiliy bayan qilin'ghan. Xewerde éytilishiche, Uyghurlar diyarida mushu yilning birinchi charikidila déhqan yashlar jem'iy 577 ming adem qétim herqaysi jaylargha yötkelgen. Bulardin 4704 kishi ichkiridiki karxanilargha ishqa orunlashqan bolup, bu sanning ötken yili 19 minggha yéqin bolghanliqi qeyt qilinidu.

Weziyet analizchilirining qarishiche Uyghurlar diyaridiki eng muhim mesililerning biri del Uyghurlarning ishsizliq mesilisi bolup, her küni minglighan xitay köchmenlirining Uyghurlar diyarigha köchüp kélishi izchil halda Uyghurlar diyaridiki ziddiyetni kücheytiwatqan amillarning biri, dep qariliwatqan idi. Mushu sewebtin ularning “Uyghurlar diyarida Uyghur déhqanlar rastinila éshincha emgek küchi hésablansa u halda xitay köchmenlirining Uyghurlar diyarigha emgek küchi süpitide köchüp kélishi hajetsiz” dep qarawatqanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet