Бу йил хотәндин 10 миңға йеқин уйғур «ешинча әмгәк күчи» намида хитай өлкилиригә йөткиветилгән

Мухбиримиз ирадә
2018-10-25
Елхәт
Пикир
Share
Принт

Хитай һөкүмити «йеза ешинча әмгәк күчини йөткәп ишқа орунлаштуруш» дәп нам берилгән уйғур елидики әмгәк күчлирини хитай өлкилиригә йөткәшни пиландин ашуруп орундиғанлиқини тәнтәнә қилмақта.

Уйғур елида чиқидиған «иқтисад хәвәрлири» гезитиниң хәвиригә қариғанда, хитай һөкүмити бу йилниң 3-пәсли аяғлашқучә болған арилиқта уйғур елиниң ичи вә сиртиға җәмий 72 миң адәмни йөткәп, «вәзипини ашуруп орундиған» икән.

Хитай даирилири өткән йили «шу җайда яки йеқин җайларда вә яки ичкири өлкиләрдә ишқа орунлаштуруш» дегән шоар бойичә қәшқәр вә хотәндин 3 йил ичидә 100 миң адәмни йөткәш пиланини оттуриға қойған. Йөткәлгән уйғур әмгәк күчлири «ишқа орунлаштуруш» намида қошна наһийәләрдики вә яки хитайниң ички өлкилиридики завутларда ишчилиққа апирилип, әрзан әмгәк күчи қатарида ишлитилмәктикән.

«Иқтисад гезити» ниң хәвиригә қариғанда, бу йил ичидә уйғур елиниң җәнубидики 3 вилайәт бир областидин ичкири өлкиләргә йөткәлгән адәм сани көрүнәрлик көпәйгән болуп, пәқәт хотән вилайитиниң өзидила алдинқи 3 пәсилдә хитай өлкилиригә йөткәлгән адәм сани 9045 нәпәр икән.

Техи йеқинда «тәңритағ тори» бир хәвәр тарқитип, «йөткәп ишқа орунлаштуруш сиясити» гә асасән бу йилниң алдинқи 3 пәслидә хитайниң ичкири өлкилиригә әвәтилгән адәм саниниң 25 миң 199 нәпәргә йетип, алдинқи охшаш мәзгилдин 7637 нәпәр көпәйгәнликини билдүргән иди.

Чәтәлләрдики уйғур көзәткүчиләр бу хилдики «ешинча әмгәк күчи» ни хитай өлкилиригә йөткәшниң уйғур яшлиридин әрзан әмгәк күчи орнида пайдилиниш билән бирликтә йәнә уйғурларни тарқақлаштуруш сиясити икәнликини билдүрмәктә.

Анализчилар бу һәқтә хәлқара қанунлардин мисал кәлтүрүп, «йәрлик уйғурларни өз юрт-маканлиридин мәҗбурий айрип, башқа җайларға көчүрүш әмәлийәттә йәрлик милләтләр һәққидики хәлқаралиқ қанун-низамларғиму еғир дәриҗидә хилаплиқ қилғанлиқ» деди.

Пикирләр (0)
Share
Толуқ бәт