Bu yil xotendin 10 minggha yéqin Uyghur “Éshincha emgek küchi” namida xitay ölkilirige yötkiwétilgen

Muxbirimiz irade
2018-10-25
Share

Xitay hökümiti “Yéza éshincha emgek küchini yötkep ishqa orunlashturush” dep nam bérilgen Uyghur élidiki emgek küchlirini xitay ölkilirige yötkeshni pilandin ashurup orundighanliqini tentene qilmaqta.

Uyghur élida chiqidighan “Iqtisad xewerliri” gézitining xewirige qarighanda, xitay hökümiti bu yilning 3-pesli ayaghlashquche bolghan ariliqta Uyghur élining ichi we sirtigha jem'iy 72 ming ademni yötkep, “Wezipini ashurup orundighan” iken.

Xitay da'iriliri ötken yili “Shu jayda yaki yéqin jaylarda we yaki ichkiri ölkilerde ishqa orunlashturush” dégen sho'ar boyiche qeshqer we xotendin 3 yil ichide 100 ming ademni yötkesh pilanini otturigha qoyghan. Yötkelgen Uyghur emgek küchliri “Ishqa orunlashturush” namida qoshna nahiyelerdiki we yaki xitayning ichki ölkiliridiki zawutlarda ishchiliqqa apirilip, erzan emgek küchi qatarida ishlitilmektiken.

“Iqtisad géziti” ning xewirige qarighanda, bu yil ichide Uyghur élining jenubidiki 3 wilayet bir oblastidin ichkiri ölkilerge yötkelgen adem sani körünerlik köpeygen bolup, peqet xoten wilayitining özidila aldinqi 3 pesilde xitay ölkilirige yötkelgen adem sani 9045 neper iken.

Téxi yéqinda “Tengritagh tori” bir xewer tarqitip, “Yötkep ishqa orunlashturush siyasiti” ge asasen bu yilning aldinqi 3 peslide xitayning ichkiri ölkilirige ewetilgen adem sanining 25 ming 199 neperge yétip, aldinqi oxshash mezgildin 7637 neper köpeygenlikini bildürgen idi.

Chet'ellerdiki Uyghur közetküchiler bu xildiki “Éshincha emgek küchi” ni xitay ölkilirige yötkeshning Uyghur yashliridin erzan emgek küchi ornida paydilinish bilen birlikte yene Uyghurlarni tarqaqlashturush siyasiti ikenlikini bildürmekte.

Analizchilar bu heqte xelq'ara qanunlardin misal keltürüp, “Yerlik Uyghurlarni öz yurt-makanliridin mejburiy ayrip, bashqa jaylargha köchürüsh emeliyette yerlik milletler heqqidiki xelq'araliq qanun-nizamlarghimu éghir derijide xilapliq qilghanliq” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet