Хитай «ешинчә әмгәк күчлири» намидики уйғур яшлирини түркүмләп вирус партлиған өлкиләргә йөткәшкә башлиди

Мухбиримиз әркин
2020-02-24
Елхәт
Пикир
Share
Принт

Хитай даирилири өткән һәптиниң ахирлиридин башлап «йеза ешинчә әмгәк күчлири» намидики уйғур яшлирини корона вируси кәң тарқалған хитай өлкилиригә түркүмләп йөткәшкә башлиған. Хитай даирилириниң бу һәрикити корона вирусиниң лагерларға тарқилип кетишидин қаттиқ әндишә қиливатқан чәтәлдики уйғурларни техиму әндишигә селип, уларда хитайниң мәқситигә қарита техиму гуман вә әндишә қозғимақта. Уйғур районидики йәрлик таратқуларниң ашкарлишичә, 22 вә 23‏-феврал күнлири уйғур районидин дәсләпки қәдәмдә аз кәм 400 дәк уйғур яш хотән, ақсу вә ақсуниң ават наһийәсидин хитайниң җеҗяң, хунән, җяңши өлкилиригә йолланған. Бу өлкиләр хубейниң вухән шәһиридин тарқалған корона вирусидин әң қаттиқ юқумланған өлкиләр болуп, бу өлкиләр вирус сәвәблик қаттиқ карантинға елинғаниди.

«Шинҗаң гезити», «җоңго хәвәрлири» қатарлиқ хитай таратқулириниң ашкарлишичә, йәрлик даириләр 23‏-феврал күни ақсуниң ават наһийәсидин 114 нәпәр уйғур яшни пойизда җяңшиниң җюҗяң шәһиригә йолға салған. Буниңдин бир күн аввал ақсу шәһиридин 100 нәпәр уйғур яш җеҗяңниң хаңҗо шәһиригә вә хотәндин 171 нәпәр яш хунәнниң чаңша шәһиригә йолға селинған. Лекин, чәтәлдики уйғурлар хитай даирилириниң уйғур яшлирини вирус райониға әвәтип, уларниң һаятиға тәвәккүл қиливатқанлиқини илгири сүрмәктә. Бу қетимқи юқумда ичкири өлкиләрдики нурғун завут карханилар тақилип кәткән. Көзәткүчиләрниң билдүрүшичә, хитай һөкүмити әмгәк күчи йетишмәсликтәк бу бошлуқни уйғур ишләмчиләр билән толдурушқа киришкән.

Пикирләр (0)
Share
Толуқ бәт