Xitay “Éshinche emgek küchliri” namidiki Uyghur yashlirini türkümlep wirus partlighan ölkilerge yötkeshke bashlidi
2020.02.24
Xitay da'iriliri ötken heptining axirliridin bashlap “Yéza éshinche emgek küchliri” namidiki Uyghur yashlirini korona wirusi keng tarqalghan xitay ölkilirige türkümlep yötkeshke bashlighan. Xitay da'irilirining bu herikiti korona wirusining lagérlargha tarqilip kétishidin qattiq endishe qiliwatqan chet'eldiki Uyghurlarni téximu endishige sélip, ularda xitayning meqsitige qarita téximu guman we endishe qozghimaqta. Uyghur rayonidiki yerlik taratqularning ashkarlishiche, 22 we 23-féwral künliri Uyghur rayonidin deslepki qedemde az kem 400 dek Uyghur yash xoten, aqsu we aqsuning awat nahiyesidin xitayning jéjyang, xunen, jyangshi ölkilirige yollan'ghan. Bu ölkiler xubéyning wuxen shehiridin tarqalghan korona wirusidin eng qattiq yuqumlan'ghan ölkiler bolup, bu ölkiler wirus seweblik qattiq karantin'gha élin'ghanidi.
“Shinjang géziti”, “Jonggo xewerliri” qatarliq xitay taratqulirining ashkarlishiche, yerlik da'iriler 23-féwral küni aqsuning awat nahiyesidin 114 neper Uyghur yashni poyizda jyangshining jyujyang shehirige yolgha salghan. Buningdin bir kün awwal aqsu shehiridin 100 neper Uyghur yash jéjyangning xangjo shehirige we xotendin 171 neper yash xunenning changsha shehirige yolgha sélin'ghan. Lékin, chet'eldiki Uyghurlar xitay da'irilirining Uyghur yashlirini wirus rayonigha ewetip, ularning hayatigha tewekkül qiliwatqanliqini ilgiri sürmekte. Bu qétimqi yuqumda ichkiri ölkilerdiki nurghun zawut karxanilar taqilip ketken. Közetküchilerning bildürüshiche, xitay hökümiti emgek küchi yétishmesliktek bu boshluqni Uyghur ishlemchiler bilen toldurushqa kirishken.