Yopurgha nahiyesidin shendung ölkisige bérip ishlewatqan "Éshincha emgek küchliri" 2000 din ashqan

Muxbirimiz qutlan
2016-07-25
Share

Igilinishiche, Uyghur aptonom rayonidin xitay ölke, sheherlirige kolléktip yötkep kétiliwatqan atalmish "Éshincha emgek küchliri" künsayin köpiyiwatqan bolup, ularning mutleq köp qismi jenubtiki 3 wilayet, bir oblasttin seperwer qilin'ghan Uyghur yashliri iken.

Tengritagh torining ilgiri sürüshiche, qeshqer wilayitining yopurgha nahiyesidinla shendung ölkisige élip bérilghan "Éshincha emgek küchliri" 2000 din ashqan bolup, ular jinen, chingdaw qatarliq sheherlerdiki toqumichiliq, kiyim-kéchek, éléktronluq buyumlar we yémeklik sahesidiki karxanilargha orunlashturulghan iken.

Ejeblinerliki shuki, Uyghur élidiki yerlik millettin bolghan yashlar "Éshincha emgek küchi" namida xitay ölkilirige yötkep kétiliwatqan bir peytte, xitay ölkiliridiki aliy mektep püttürgen xitay yashliri Uyghur éligha jelp qilinmaqtiken.

"Shinjang iqtisad géziti" ning xewer qilishiche, bu yilning özide xitay ölkiliridiki aliy mekteplerni püttürgen 1800 neper yash "Gherbiy qisimgha yardem bergüchi studéntlar pilani" dégen layihe boyiche Uyghur aptonom rayonidiki ish orunlirigha jelp qilin'ghan iken.

Da'irilerning Uyghur aptonom rayonidiki Uyghur yashlirini "Éshincha emgek küchi" süpitide xitay ölkilirige yötkishi we xitay yashlirini "Gherbiy qisimgha yardem bérish" namida Uyghur aptonom rayonigha jelp qilishi dunya Uyghur qurultiyini öz ichige alghan xelq'aradiki teshkilatlarning küchlük tenqidige duch kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet