Үрүмчидә бир һәптә ичидә 2 милйон 300 миң адәмниң ядро кислата әвришкиси елинған

Мухбиримиз әркин
2020-07-24
Share

Уйғур аптоном райониниң мәркизи үрүмчидә корона вируси қайта тарқалған йеқинқи бир һәптә ичидә аз кәм 2 милйон 310 миң кишиниң ядро кислата әвришкиси тәкшүрүлгән.

Үрүмчи шәһириниң башлиқи ясин сидиқниң 24-июл өткүзүлгән ахбарат йиғинида ашкарилишичә, 23-июл бир күнниң өзидә 683 миң 95 кишиниң ядро кислатаси әвришкиси һәқсиз тәкшүрүлгән. Хитай даирилириниң қисқиғинә вақит ичидә нурғун маддий вә адәм күчини сәпәрвәр қилип, бунчилик көп адәмниң ядро кислата әврискисини тәкшүрүши диққәт қозғиди.

Ясин сидиқ 24-июл өткүзүлгән ахбарат йиғинида пуқраларниң өзлирини "чүшәңәнлики, қоллиғанлиқи вә һәмкарлашқанлиқиға рәһмәт ейтидиғанлиқи" ни билдүрүп, кейинки қәдәмдә "ядро кислатасини тәкшүрүш иқтидарини давамлиқ өстүридиғанлиқи" ни тәкитлигән. Хитай һөкүмити 2016-йилиму нурғун маддий вә адәм күчини сәпәрвәр қилип, уйғурларға қарита "һәқсиз саламәтлик тәкшүрүши" елип барған. Лекин кейинрәк бу тәкшүрүшниң уйғурларниң DNA әвришкисини йиғип, DNA амбири қуруш, уйғурларни DNA арқилиқ контрол қилиш мәқситидә елип берилғанлиқи мәлум болған иди.

Ясин сидиқниң ашкарилишичә, бу қетимқи ядро кислата әвришкисини тәкшүрүш һәрикитигә 7 миң хадим қатнишип, кечә-күндүз ишлигән. Хитай һөкүмити һазирға қәдәр корона вируси юқуминиң уйғур диярида қайта тарқилишиға қандақ амил сәвәб болғанлиқини елан қилип бақмиди. Шинхуа агентлиқиниң билдүрүшичә, 23-июл күни районда 13 йеңи юқумдар вә 19 нәпәр юқум гумандари байқалған. Йеңи байқалған юқумдарларниң һәммиси үрүмчи шәһиридә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт